తొమ్మిది సినిమాల జాతర ఉంది కానీ

నవంబర్ నెల తొలి శుక్రవారం బోలెడు సినిమాలు మోసుకొస్తోంది కానీ మూవీ లవర్స్ లో ఏమంత ఆసక్తి కనిపించకపోవడం బాక్సాఫీస్ కి ఏమంత జోష్ ఇచ్చేలా లేదు. దీపావళికి వచ్చిన లక్కీ భాస్కర్, క, అమరన్ మూడు స్టార్ పవర్ మీద కాకుండా కంటెంట్ తో జనాన్ని మెప్పించడంతో సూపర్ హిట్ దశని దాటి బ్లాక్ బస్టర్ వైపు దూసుకెళ్తున్నాయి. వీటి జోరు సెకండ్ వీక్ లోనూ కొనసాగుతుందనే అంచనాలున్న నేపథ్యంలో కొత్త రిలీజుల పట్ల బజ్ లేకపోవడం బయ్యర్లలో ఆందోళన రేకెత్తిస్తోంది. ఉన్నంతలో జనం దృష్టిలో పడే అవకాశం ఉన్న వాటిలో మొదటగా చెప్పుకోవాల్సింది నిఖిల్ అప్పుడో ఇప్పుడో ఎప్పుడో.

షూటింగ్ ఎప్పుడు జరిగిందో ఎంత టైం పట్టిందో తెలియకుండానే హఠాత్తుగా ఊడిపడటంతో ఆఘమేఘాల మీద ప్రమోషన్లు చేస్తున్నారు. నిఖిల్, సుధీర్ వర్మలు ఇంటర్వ్యూలలో పాల్గొంటూ ఆసక్తి పుట్టించేలా చేస్తున్నాడు. నవంబర్ 8 వస్తున్న వాటిలో ఇదే కొంచెం అడ్వాంటేజ్ ఉన్నది. మిగిలిన లిస్టు చూసుకుంటే ధూమ్ ధామ్, జితేందర్ రెడ్డి, జాతర, ఈసారైనా, రహస్యం ఇదం జగత్, వంచన, జ్యూయల్ థీఫ్ ఉన్నాయి. వీటిలో రెండు మూడు పబ్లిసిటీ పరంగా శ్రద్ధ తీసుకుంటున్నాయి కానీ ఓపెనింగ్స్ రావడం అనుమానమే. పబ్లిక్ టాక్ అనూహ్యంగా ఉంటే తప్ప థియేటర్లకు పబ్లిక్ ని లాగడం డౌటే.

ఒక రోజు ముందు ఏడో తేదీ తమిళ డబ్బింగ్ బ్లడీ బెగ్గర్ ని సురేష్ – ఏషియన్ సంస్థలు సంయుక్తంగా తీసుకొస్తున్నాయి. కెవిన్ హీరోగా నటించగా జైలర్ దర్శకుడి నెల్సన్ దిలీప్ కుమార్ ప్రొడక్షన్ లో రూపొందింది. గత వారం తమిళంలో రిలీజై డీసెంట్ రివ్యూస్, టాక్ దక్కించుకున్న నేపథ్యంలో మన ఆడియన్స్ ఎలా రిసీవ్ చేసుకుంటారో. లెక్క చూసుకుంటే తొమ్మిది దాకా ఉన్నాయి కానీ ఏవి మెప్పిస్తాయో చూడాలి. వారం గ్యాప్ లో నవంబర్ 14న సూర్య కంగువ, వరుణ్ తేజ్ మట్కా, అశోక్ గల్లా దేవకీనందన వాసుదేవ వస్తున్న నేపథ్యంలో మొదటి వారం పైన చెప్పిన తొమ్మిది సినిమాలకు కీలకం కానుంది.