అంచనాలు పెంచేది ఎప్పుడో ఇంకెప్పుడో

బహుశా నిఖిల్ కెరీర్ లోనే తక్కువ సౌండ్ తో వస్తున్న సినిమా అప్పుడో ఇప్పుడో ఎప్పుడో. నవంబర్ 8 విడుదలలో ఎలాంటి మార్పు లేదని తాజాగా మొదలైన ప్రమోషన్లతో క్లారిటీ వచ్చేసింది.

అయితే కేవలం అయిదు రోజులే ఉన్నప్పటికీ పబ్లిసిటీ పరంగా దూకుడు పెంచకపోవడం అసలు ఈ సినిమా వస్తోందనే సంగతి కామన్ ఆడియన్స్ కి తెలుసాని అనుమానం వచ్చేలా ఉంది. సప్తసాగరాలు దాటి సైడ్ ఎబిలతో తెలుగు ప్రేక్షకులకు దగ్గరైన రుక్మిణి వసంత్ హీరోయిన్ గా నటించిన ఈ చిత్రం ఏ జానరో కూడా రివీల్ చేయకుండా ఉన్నారు. ట్రైలర్ చూశాక ఎలాగూ తెలుస్తుంది కానీ ముందైతే క్లూస్ ఇవ్వాలిగా.

అప్పుడో ఇప్పుడో ఎప్పుడోకున్న ప్రధాన సమస్య రిలీజ్ విషయంలో జరిగిన జాప్యం. సరే జరిగిందేదో జరిగిందనుకున్నా పబ్లిక్ లో హాట్ టాపిక్ గా మారేలా ఏదో ఒకటి చేయకపోతే ఆడియన్స్ దృష్టిలో పడటం కష్టం. నిత్యం పేరు నానుతూ ఉండాలి.

నిఖిల్ స్వయంగా ఇంటర్వ్యూలు గట్రా చేస్తున్నా హైప్ పెంచే క్రమంలో ప్రొడక్షన్ హౌస్ మరీ వేగంగా లేకపోవడం ఉన్ని కాసిన్ని అంచనాలను తగ్గించేస్తుంది. పోనీ దర్శకుడి బ్రాండ్ మీద ఏమైనా మార్కెటింగ్ చేద్దామా అంటే సుధీర్ వర్మ గత రెండు సినిమాలు రవితేజ రావణాసుర, శాకినీ డాకిని రెండూ మాములు డిజాస్టర్లు కాలేదు.

రాబోయే శుక్రవారం పెద్దగా పోటీ లేదు. నాలుగైదు సినిమాలు రేసులో ఉన్నాయి కానీ అమాంతం ప్రేక్షకుల దృష్టిని ఆకర్షించినవి లేవు. సో ఈ అవకాశాన్ని అప్పుడో ఇప్పుడో ఎప్పుడో వాడుకోవచ్చు. అదేదో ఆషామాషీగా ఉండకూడదు. ఒకవైపేమో లక్కీ భాస్కర్, క, అమరన్ రెండో వారంలోనూ స్ట్రాంగ్ రన్ కొనసాగించడం ఖాయంగా కనిపిస్తోంది.

ఆపై నవంబర్ 14 మట్కా, కంగువ, దేవకీనందన వాసుదేవలు దిగుతున్నాయి. వీటి మధ్య కేవలం వన్ వీక్ టార్గెట్ తో అప్పుడో ఎప్పుడో ఎప్పుడో దిగడం ఖచ్చితంగా రిస్కే. సినిమా బాగుంటే ఢోకా లేదు కానీ తడబడితే మాత్రం లేనిపోని ఇబ్బందులు. చూడాలి.