తండేల్ చివరి నిర్ణయం అదేనా

అక్కినేని అభిమానులు అప్డేట్స్ కోసం అలో లక్ష్మణా అంటూ తపించిపోతున్న తండేల్ విడుదల తేదీ వ్యవహారం ఒక కొలిక్కి వచ్చే దిశగా వెళ్తోందని ఇన్ సైడ్ టాక్. సంక్రాంతికే వదలమని ఫ్యాన్స్ నుంచి ఎంత ఒత్తిడి వస్తున్నప్పటికీ ప్రాక్టికల్ గా ఆలోచిస్తున్న నిర్మాత అల్లు అరవింద్ సోలో రిలీజ్ కోసమే కట్టుబడతారని తెలిసింది. అయితే జనవరిలో వచ్చేందుకు అవకాశం తక్కువ. ఉన్న ఒక్క ఆప్షన్ చివరి వారంలో వచ్చే రిపబ్లిక్ డే. ఇది మంది డేటే. సరైన ప్లానింగ్ చేసుకుని ప్రమోషన్లు చేసుకుంటే ఆడియన్స్ కి బాగా రీచ్ అవుతుంది. లేదూ అంటే ఫిబ్రవరిలో ఎట్టి పరిస్థితుల్లో వచ్చే తీరాలి. 

గతంలో నాగచైతన్య సినిమాల్లో ఏ మాయ చేసావే ఫిబ్రవరిలో రిలీజై మంచి విజయం అందుకుంది. రికార్డులు బద్దలు కాలేదు కానీ సూపర్ హిట్ తో పాటు కల్ట్ క్లాసిక్ గా మిగిలిపోయింది. తర్వాత అధిక శాతం చైతు సక్సెస్ లన్నీ మేలోనే వచ్చాయి. అలాంటప్పుడు ఫిబ్రవరి సరైన ఛాయస్ కాదనేది అభిమానుల వాదన. అయితే ఇదేమి బ్యాడ్ మంత్ కాదు. గతంలో ఎన్నో బ్లాక్ బస్టర్లు వచ్చిన దాఖలాలున్నాయి. సంక్రాంతికి రామ్ చరణ్ గేమ్ ఛేంజర్, బాలయ్య 109, వెంకటేష్ సంక్రాంతికి వస్తున్నాం, సందీప్ కిషన్ మజాకాలు ఆల్రెడీ ఉన్న నేపథ్యంలో తండేల్ దింపడం ఓపెనింగ్స్ పరంగా ఎంత మాత్రం సేఫ్ కాదనేది గీతా ఆర్ట్స్ వెర్షన్. 

ఈ లెక్కన చూస్తుంటే జనవరి చివరి వారం కూడా మిస్ అయితే ఫిబ్రవరిలోనే తండేల్ దర్శనం ఉంటుంది. ఇంకో రెండు మూడు రోజుల్లో ప్రెస్ మీట్ పెట్టి దీనికి సంబంధించి అధికారిక ప్రకటన ఇవ్వబోతున్నారు. చందూ మొండేటి దర్శకత్వం వహించిన ఈ ఎమోషనల్ యాక్షన్ డ్రామాలో సాయిపల్లవి పాత్ర, దేవిశ్రీ ప్రసాద్ సంగీతం మీద భారీ అంచనాలున్నాయి. ఇండియా నుంచి పాకిస్థాన్ వెళ్లి అక్కడ జైల్లో మగ్గిన స్నేహితుల కోసం చైతు ఏం చేశాడనే పాయింట్ మీద తండేల్ రూపొందింది. సముద్రం ఎపిసోడ్లు, జాతర పాట, హీరో హీరోయిన్ ప్రేమకథ, పాక్ సన్నివేశాలు చాలా బాగా వచ్చాయని అంటున్నారు.