భార్యకు 4 పెళ్లిళ్లు.. ఐదో భర్తకు హైకోర్టులో ఊరట..

సాధారణంగా భార్యాభర్తల మధ్య తలెత్తే వివాదాలు కుటుంబాలకే పరిమితమవుతుంటాయి. కానీ కర్ణాటకలో వెలుగులోకి వచ్చిన ఓ వైవాహిక వివాదం మాత్రం ఏకంగా హైకోర్టు వరకు చేరింది. తొమ్మిది వివాహాలు చేసుకున్నారనే ఆరోపణలు ఎదుర్కొంటున్న ఓ మహిళ తన ఏడో భర్తపై పెట్టిన వేధింపుల కేసు ఇప్పుడు చర్చనీయాంశంగా మారింది. ఈ వ్యవహారంలో కీలక అంశాలను పరిశీలించిన కర్ణాటక హైకోర్టు, భర్తపై కొనసాగుతున్న క్రిమినల్ కేసును కొట్టివేసింది.

వివరాల్లోకి వెళ్తే.. కర్ణాటకలోని హోస్పేటకు చెందిన రాజకీయ నాయకుడు రాజా హుస్సేన్ (47), తబస్సుమ్ (30) అనే మహిళను 2022 జనవరి 13న వివాహం చేసుకున్నారు. అయితే వీరి వైవాహిక జీవితం ఎక్కువ కాలం సజావుగా సాగలేదు. పెళ్లయిన కొద్ది నెలలకే ఇద్దరి మధ్య విభేదాలు మొదలయ్యాయి. ఈ క్రమంలో తన భర్త వరకట్నం కోసం వేధిస్తున్నాడని, శారీరకంగా హింసిస్తున్నాడని తబస్సుమ్ పోలీసులను ఆశ్రయించారు. ఆమె ఫిర్యాదు మేరకు పోలీసులు కేసు నమోదు చేసి దర్యాప్తు అనంతరం చార్జిషీట్ దాఖలు చేశారు.

అయితే తనపై నమోదైన కేసును సవాలు చేస్తూ రాజా హుస్సేన్ కర్ణాటక హైకోర్టును ఆశ్రయించారు. ఈ సందర్భంగా తన భార్యకు గతంలోనే పలువురితో వివాహాలు జరిగాయని, మొత్తం తొమ్మిది పెళ్లిళ్లు చేసుకున్నట్లు ఆధారాలు ఉన్నాయని ఆయన కోర్టుకు వివరించారు. ప్రతి వివాహం తర్వాత వివాదాలు తలెత్తడం, పోలీసులకు ఫిర్యాదు చేయడం, ఆ తర్వాత రాజీ ప్రయత్నాలు జరగడం వంటి పరిణామాలు చోటుచేసుకున్నాయని ఆరోపించారు. ఇందుకు సంబంధించిన పత్రాలను కూడా న్యాయస్థానం ముందు ఉంచారు.

మరోవైపు ఈ వాదనలను తబస్సుమ్ తరఫు న్యాయవాది ఖండించారు. ఆమె తొమ్మిది వివాహాలు చేసుకున్నారన్న ఆరోపణ నిజం కాదని, కేవలం నాలుగు వివాహాలు మాత్రమే జరిగాయని తెలిపారు. గత భర్తల నుంచి విడాకులు, తలాక్ లేదా ఖులా ద్వారా చట్టబద్ధంగా విడిపోయిన తర్వాతే మరో వివాహం చేసుకున్నారని కోర్టుకు వివరించారు. అంతేకాకుండా తన భర్తపై చేసిన ఫిర్యాదులో వాస్తవాలు ఉన్నాయని, కేసును కొనసాగించేందుకు అనుమతించాలని కోరారు.

ఇరువైపుల వాదనలు, పోలీసుల దర్యాప్తులో లభించిన వివరాలను పరిశీలించిన జస్టిస్ ఎం. నాగప్రసన్న కీలక వ్యాఖ్యలు చేశారు. మహిళ చేసిన ఆరోపణల్లో స్పష్టమైన సంఘటనలు, నిర్దిష్టమైన వివరాలు, నేరాన్ని నిరూపించగల ప్రాథమిక ఆధారాలు లేవని ధర్మాసనం అభిప్రాయపడింది. కేవలం క్రూరత్వం, వేధింపులు, బెదిరింపులు వంటి పదాలు ఉపయోగించినంత మాత్రాన నేరం రుజువైనట్లు కాదని స్పష్టం చేసింది.

అదే సమయంలో ఒక వ్యక్తి ఎన్ని వివాహాలు చేసుకున్నారనే అంశం ఆధారంగా వారి వ్యక్తిత్వాన్ని అంచనా వేయలేమని, గతంలో ఎన్నిసార్లు వివాహం చేసుకున్నారనే కారణంతో మహిళ ఫిర్యాదును పూర్తిగా అనుమానించకూడదని కోర్టు స్పష్టం చేసింది. ప్రతి ఫిర్యాదును అందులోని ఆధారాలు, వాస్తవాల ఆధారంగానే పరిశీలించాలని పేర్కొంది.

చివరకు ఈ కేసులో విచారణ కొనసాగించడం న్యాయ ప్రక్రియను దుర్వినియోగం చేయడమే అవుతుందని భావించిన కర్ణాటక హైకోర్టు, రాజా హుస్సేన్‌పై నమోదైన క్రిమినల్ కేసును రద్దు చేసింది. దీంతో ఐదో భర్తగా పేర్కొన్న రాజా హుస్సేన్‌కు ఊరట లభించింది. అయితే ఈ తీర్పు వెనుక ప్రధాన కారణం వివాహాల సంఖ్య కాదు.. ఫిర్యాదులో నేరాన్ని నిరూపించేందుకు అవసరమైన ఆధారాలు లేకపోవడమే కావడం గమనార్హం.