గ్రీన్‌కార్డ్ కోసం ఎదురుచూస్తున్న భారతీయులకు మరో షాక్

అమెరికాలో గ్రీన్‌కార్డ్ కోసం ఎదురుచూస్తున్న కాగ్నిజెంట్ ఉద్యోగులకు మరో సమస్య ఎదురైంది. అమెరికా కార్మిక శాఖ కాగ్నిజెంట్ నుంచి వచ్చే కొత్త పర్మనెంట్ లేబర్ సర్టిఫికేషన్ దరఖాస్తులను నిలిపివేసింది. కంపెనీకి సంబంధించిన H-1B, పర్మ్ కార్యక్రమాలపై విచారణ పూర్తయ్యే వరకు కొత్త పర్మ్ ఫైలింగ్స్ చేయడానికి అవకాశం ఉండదని సమాచారం.

పర్మ్ అంటే అమెరికాలో ఉద్యోగం చేస్తూ గ్రీన్‌కార్డ్ కోసం వెళ్లే వారు పూర్తి చేయాల్సిన మొదటి దశ. విదేశీ ఉద్యోగిని శాశ్వత నివాసానికి స్పాన్సర్ చేసే ముందు, ఆ ఉద్యోగానికి అర్హులైన అమెరికన్ వర్కర్లు అందుబాటులో లేరని కంపెనీ నిరూపించాలి. ఈ ప్రక్రియ పూర్తయ్యాకే తర్వాతి గ్రీన్‌కార్డ్ దశలకు వెళ్లే అవకాశం ఉంటుంది.

కాగ్నిజెంట్‌లో పనిచేస్తున్న భారతీయులపై దీని ప్రభావం ఎక్కువగా ఉండొచ్చు. 2026 ఆర్థిక సంవత్సరం నాలుగో త్రైమాసికంలో కాగ్నిజెంట్‌కు 2,657 H-1B అనుమతులు వచ్చాయి. అమెజాన్, ఇన్ఫోసిస్, టీసీఎస్ తర్వాత అత్యధిక H-1B అనుమతులు పొందిన కంపెనీల్లో ఇది ఒకటి. వీరిలో భారతీయులు కూడా పెద్ద సంఖ్యలో ఉన్నారు.

అయితే ఇప్పటికే ఇమ్మిగ్రేషన్ స్టేటస్‌లన్నీ పూర్తి చేసుకున్న వారికి ఇది వర్తించదు. ప్రస్తుతం ప్రధానంగా కొత్త పర్మ్ ఫైలింగ్స్‌పైనే ఆంక్ష ఉంది. ఇప్పటికే ప్రాసెస్‌లో ఉన్న కేసుల పరిస్థితి మాత్రం ఆయా దశలు, ప్రభుత్వ నిర్ణయాలపై ఆధారపడి ఉంటుంది. విచారణ ముగిసే వరకు కొత్తగా గ్రీన్‌కార్డ్ ప్రక్రియ మొదలుపెట్టాలనుకునే ఉద్యోగులకు ఆలస్యం తప్పకపోవచ్చు.

ఇదే సమయంలో క్లౌడెరా అనే మరో టెక్ కంపెనీపైనా అమెరికా కార్మిక శాఖ చర్యలు తీసుకుంది. ఆ కంపెనీ పర్మ్ దరఖాస్తుల ప్రాసెసింగ్‌ను 180 రోజుల పాటు నిలిపివేసింది. అమెరికన్ ఉద్యోగులకు అవకాశం ఇవ్వకుండా విదేశీ వర్కర్లను తీసుకున్నారనే ఆరోపణలపై అక్కడ దర్యాప్తు జరుగుతోంది. కాగ్నిజెంట్ మాత్రం ఈ విషయంపై ఇంకా అధికారిక ప్రకటన చేయలేదు.