కోహ్లీ, రోహిత్‌… అసలైన అగ్నిపరీక్ష

టీమిండియా మరో పోరుకు సిద్ధమైంది. ఎడ్జ్‌బాస్టన్ వేదికగా ఇంగ్లాండ్ తో ఈరోజు వన్డే సిరీస్ మొదలుకానుంది. వరుస టీ20 సిరీస్ లో ఎదురైన ఘోర పరాభవం తర్వాత అందరి దృష్టీ ఇప్పుడు విరాట్ కోహ్లీ, రోహిత్ శర్మలపైనే పడింది. కుర్రాళ్ల వైఫల్యాల నడుమ ఈ ఇద్దరు సీనియర్లు జట్టును ఎలా ఆదుకుంటారనేది క్రీడా వర్గాల్లో ఆసక్తికరంగా మారింది. ఈ సిరీస్ పరువు కోసం మాత్రమే కాదు, వచ్చే ఏడాది వన్డే వరల్డ్ కప్ కు అసలైన ఛాలెంజ్.

ఇప్పటికే టెస్ట్, టీ20లకు రిటైర్మెంట్ ఇచ్చిన ఈ ఇద్దరు ప్రస్తుతం వన్డే ఫార్మాట్ లోనే ఉన్నారు. ఇక వన్డే వరల్డ్ కప్ వరకు ఉంటారా లేదా అనేది ప్రతిసారీ హాట్ టాపిక్ గా మారుతోంది. ఇక వరల్డ్ కప్ ఆఫ్రికా పిచ్ లు ఇంగ్లాండ్ వాతావరణాన్ని పోలి ఉంటాయి. కాబట్టి ఇక్కడ రాణిస్తేనే వరల్డ్ కప్ జట్టులో అవకాశం దక్కుతుంది. ఐపీఎల్ సమయంలో కోహ్లీ చేసిన వ్యాఖ్యలను బట్టి చూస్తే సీనియర్లకు జట్టులో స్థానం గ్యారెంటీ అనే రోజులు పోయాయని అర్థమవుతోంది. 

సొంతగడ్డపై వెస్టిండీస్, శ్రీలంక, జింబాబ్వే లాంటి జట్లపై ఆడి పరుగులు సాధించడం వీరికి పెద్ద కష్టమేమీ కాదు. ఫ్లాట్ పిచ్ లపై వచ్చే ఆ రికార్డులు వరల్డ్ కప్ ఎంపికకు ఏమాత్రం కొలమానం కావు. అందుకే ఇంగ్లాండ్, న్యూజిలాండ్ లాంటి కఠినమైన విదేశీ పర్యటనల్లో వీరు కచ్చితంగా సత్తా చాటాల్సిందే. 

ఇక్కడ విఫలమైతే మాత్రం జట్టు నుంచి తప్పించాలనే డిమాండ్లు మొదలయ్యే ప్రమాదం ఉంది. ఇటీవల ఐర్లాండ్ చేతిలో ఓటమి, ఆ వెంటనే ఇంగ్లాండ్ చేతిలో నాలుగు సున్నా తేడాతో టీ20 సిరీస్ కోల్పోవడం భారత క్రికెట్ ను కుదిపేసింది. ఇలాంటి కష్టకాలంలో జట్టుకు ఒక అద్భుతమైన విజయం కావాలి. రీసెంట్ గా అఫ్గాన్ తో వన్డేలు ఆడని కోహ్లీ, ఆ సిరీస్ లో అంతంత మాత్రంగానే ఆడిన రోహిత్ కు తమను తాము నిరూపించుకోవడానికి ఇదొక సువర్ణావకాశం.

కష్టకాలంలో ఉన్న టీమిండియాను కనక ఈ సిరీస్ లో గెలిపిస్తే కోహ్లీ, రోహిత్ లు నిజమైన హీరోలుగా మళ్ళీ క్లిక్ అయ్యే అవకాశం ఉంటుంది. టీ20 వైఫల్యాల నేపథ్యలో వీరి అద్భుత ప్రదర్శనకు రెట్టింపు ప్రశంసలు దక్కుతాయి. ఒకవేళ ఏమాత్రం తడబడినా తీవ్ర విమర్శలు తప్పవు. సింపుల్ గా చెప్పాలంటే పరుగులు సాధించి మ్యాచ్ లు గెలిపిస్తే వరల్డ్ కప్ టికెట్ దక్కుతుంది. మరి విరాట్, రోహిత్ జోడీ ఏ విధంగా జట్టును నిలబెడతారో చూడాలి.