కేసీయార్.! పార్టీ పేరు మార్చుకోక తప్పదేమో.!

లోక్ సభ ఎన్నికల తర్వాత ఏ క్షణాన అయినా, పార్టీ పేరు మార్పు విషయమై తెలంగాణ మాజీ ముఖ్యమంత్రి, భారత్ రాష్ట్ర సమితి అధినేత కల్వకుంట్ల చంద్రశేఖర్ రావు కీలక నిర్ణయం తీసుకోవచ్చునట.!
2023 తెలంగాణ అసెంబ్లీ ఎన్నికల్లో ఓటమి తర్వాత, ‘పార్టీ పేరుని మార్చేయడమే మంచిది..’ అనే అభిప్రాయం పార్టీ వర్గాల్లో వ్యక్తమయ్యింది. నిజానికి, ఆ ఎన్నికలకు ముందరే, ‘పార్టీ పేరుని మార్చేద్దాం.. తిరిగి తెలంగాణ రాష్ట్ర సమితి అనే పెట్టుకుందాం..’ అని కేసీయార్‌కి కొందరు పార్టీ కీలక నేతలు సూచన చేశారు.

అయితే, జాతీయ రాజకీయాల్లో చక్రం తిప్పే దిశగా తెలంగాణ రాష్ట్ర సమితిని భారత్ రాష్ట్ర సమితిగా మార్చిన కేసీయార్, తిరిగి తెలంగాణ రాష్ట్ర సమితి పేరుని తీసుకొచ్చేందుకు అంత సానుకూలత వ్యక్తం చేయలేదు.
కానీ, ఇప్పుడు పార్టీ పేరు మార్చక తప్పని పరిస్థితి ఏర్పడింది. ఎందుకంటే, ‘తెలంగాణ అంటే టీఆఆర్ఎస్.. టీఆర్ఎస్ అంటే తెలంగాణ.. పార్టీ పేరు నుంచి తెలంగాణ మాయమయ్యాక.. గులాబీ పార్టీని తమదిగా భావించలేకపోతున్నాం..’ అన్న భావన తెలంగాణ పల్లెల్లో గులాబీ పార్టీ సానుభూతి పరులనుంచే వ్యక్తమవుతోంది.

ఇప్పటికే, పేరు మార్పు విషయమై సాధ్యాసాధ్యాల పరిశీలన జరిగిందనీ, ప్రస్తుతం ఎన్నికల కోడ్ అమల్లో వున్నందున, కాస్త వేచి చూద్దామని పార్టీ ముఖ్య నేతలకు కేసీయార్ సూచించారట.

పేరు మార్చితే గులాబీ పార్టీ ఫేటు మారుతుందా.? అంటే, మారే అవకాశాలైతే లేకపోలేదు. భారత్ రాష్ట్ర సమితి పేరుని గులాబీ శ్రేణులే ఓన్ చేసుకోలేని పరిస్థితిని కేసీయార్ ముందే అంచనా వేయకపోవడం వ్యూహాత్మక తప్పిదమే.! తెలంగాణ రాష్ట్ర సమితి.. ఇది తెలంగాణ ఇంటి పార్టీ అన్న భావన తెలంగాణ సమాజంలో ఖచ్చితంగా కలుగుతుంది.