మంట‌లు రేపుతున్న `ఫాం-6..`

కొత్త‌గా ఓటు న‌మోదు చేసుకోవాల‌ని అనుకునేవారు.. కేంద్ర ఎన్నిక‌ల సంఘం వెబ్ సైట్ లేదా..అధికారుల నుంచి ఫాం-6ను తీసుకుని దానిని ఫిల‌ప్ చేసి అందిస్తే.. విచార‌ణ త‌ర్వాత అధికారులు ఓటు హ‌క్కును ప‌రిశీలించి ఓటును క‌ల్పిస్తారు. ఇది.. ఇప్ప‌టి వ‌ర‌కు అంటే.. ఈ ఏడాది జూలై వ‌ర‌కు ఎలాంటి వివాదాల‌కు అవ‌కాశం లేకుండా జ‌రిగిన సాఫీ ప్ర‌క్రియ‌. కానీ, జూలై త‌ర్వాత‌.. అనూహ్యంగా ఫాం-6కు సంకెళ్లు ప‌డ్డాయి. ఈ ఫాం-6లో న‌మోదు చేసే వివ‌రాల‌కు.. 2002 నాటి ఎన్నిక‌ల జాబితాతో(సుమారు 14 ఏళ్ల కింద‌టి జాబితా) కేంద్ర ఎన్నిక‌ల సంఘం ముడి పెట్టింది. ఇది కాస్తా వివాదం అయింది.

తాజాగా ఈ వ్య‌వ‌హారంపై విచార‌ణ జ‌రిపిన సుప్రీంకోర్టుకు.. అయ్యా మీరు చెబితేనే అలా చేశాం అంటూ ఎన్నిక‌ల సంఘం వివ‌ర‌ణ ఇచ్చే ప్ర‌య‌త్నం చేసింది. దీనిని సుప్రీంకోర్టు తీవ్రంగా ఖండించింది. మేం అలా చెప్ప‌లేదు. మీరేమైనా క‌ల‌గ‌న్నారా? అని ఘాటుగానే వ్యాఖ్యానించి.. ఎన్నిక‌ల సంఘాన్ని త‌ప్పుబ‌ట్టింది. అంతేకాదు.. అస‌లు ఫాం -6లో మార్పులు ఎందుకు చేశారు? ఎవ‌రు ఛేశారు? ఎన్నిక‌ల సంఘంలోని ముగ్గురు క‌మిష‌నర్ల సంయుక్త నిర్ణ‌య‌మా? ఒక్క‌రే తీసుకున్న నిర్ణ‌య‌మా? అని కూడా నిల‌దీసింది. మొత్తంగా ఈ వ్య‌వ‌హారంపై త‌మ‌కు అఫిడ‌విట్ రూపంలో వివ‌ర‌ణ స‌మ‌ర్పించాల‌ని సుప్రీంకోర్టు ఆదేశించింది.

క‌ట్ చేస్తే..

తాజాగా ఫాం-6పై సుప్రీంకోర్టు చేసిన వ్యాఖ్య‌ల‌తో కేంద్ర ఎన్నిక‌ల సంఘం ప్ర‌ధాన క‌మిష‌న‌ర్ జ్ఞానేష్ కుమార్ చుట్టూ మ‌రిన్ని ప్ర‌శ్న‌లు అల్లుకున్నాయి. సుప్రీంకోర్టు చెప్ప‌న‌ప్పుడు.. ఫాం-6లో మార్పులు చేయాల‌ని ఎవ‌రు చెప్పారు? ఎందుకు చేశారు? అని ప్ర‌తిప‌క్షాలు స‌హా.. సోష‌ల్ మీడియాలోనూ పెద్ద ఎత్తున ప్ర‌శ్న‌లు వెల్లువెత్తుతున్నాయి. ఫాం-6లో 2002 నాటి జాబితాను ఎందుకు పేర్కొన్నారు? మార్పులు ఎందుకు చేశారు? ఎవ‌రి ప్రోద్బ‌లంతో మార్పులు చేశార‌ని ప్ర‌శ్న‌లు గుప్పిస్తున్నారు. దీనికి ఇప్ప‌టి వ‌ర‌కు కేంద్ర ఎన్నిక‌ల సంఘం స‌మాధానం చెప్ప‌లేదు. అయితే.. ఇప్ప‌టికే ఆ నిబంధ‌న‌(2002 నాటి జాబితా)ను తొల‌గించాం అని మాత్రమే పేర్కొంది.

అస‌లేంటి వివాదం?

దేశంలో ఓటర్ల జాబితా ప్రక్షాళన కోసం చేపట్టిన ప్రత్యేక సమగ్ర సవరణ (స‌ర్‌) ప్రక్రియలో భాగంగా జూలైలో ఆన్‌లైన్ ఫాం-6లో ఒక కొత్త డిక్లరేషన్‌ను ఎన్నిక‌ల సంఘం జోడించింది. దీని ప్రకారం, దరఖాస్తుదారుడు తన పేరుగానీ, లేదా వారి తల్లిదండ్రులు, తాతముత్తాతల పేర్లు గత ఎస్‌ఐఆర్(2002) ఓటర్ల జాబితాలో ఉన్నాయా లేదా అనే వివరాలను తప్పనిసరిగా ఎంచుకోవాల్సి ఉంటుంది. ఇవి లేక‌పోతే.. ఓటు హ‌క్కుల‌భించ‌దు. ఆన్‌లైన్ పోర్టల్‌లో ఈ డిక్లరేషన్ పూర్తి చేయకుంటే ఫాం-6 సబ్మిట్ చేయడం సాధ్యమ‌య్యేది కాదు. దీంతో దేశ‌వ్యాప్తంగా పెద్ద ఎత్తున విమ‌ర్శ‌లు వ‌చ్చాయి. ఓట్ చోరీ అంటూ.. ప్ర‌తిప‌క్షాలు ఎన్నిక‌ల సంఘంపై నిప్పులు చెరిగాయి. ఇప్పుడు ఈ వివాద‌మే భోగి మంట‌గా మారింది. మ‌రి ఏం జ‌రుగుతుందో చూడాలి.