‘రామన్న, జగనన్న దోస్తులయిన్రు’

తెలంగాణలో 2018, ఏపీలో 2019 ఎన్నికలకు ముందు వైసీపీ, బీఆర్ఎస్ అలయ్ బలయ్ అంటూ ఒకరికి ఒకరు మద్దతు ఇచ్చి పుచ్చుకున్న సంగతి తెలిసిందే. మాజీ సీఎం కేసీఆర్ ను పితృసమానుడిగా చూసిన జగన్…కేటీఆర్ ను సోదర సమానుడిగా భావించి రాజకీయం నడిపారన్న విషయం ప్రజలందరికీ తెలుసు. అదే మాదిరిగా 2023లో తెలంగాణలో, 2024లో ఏపీలో జరిగిన ఎన్నికల్లో సైతం జగన్, కేటీఆర్ లు భాయిభాయి అంటూ ముందుకు సాగినా ఫలితం వారికి అనుకూలంగా రాలేదన్నది వేరే విషయం. అయితే, ఈ విషయం ఏపీ, తెలంగాణ ప్రజలందరికీ తెలిసినా సరే…కేటీఆర్ సోదరి కవిత మాత్రం తనకు ఇప్పుడే తెలిసింది అంటూ అవాక్కయిన వైనం ఇప్పుడు హాట్ టాపిక్ గా మారింది.

బీఆర్ఎస్, కాంగ్రెస్…ఈ రెండు పార్టీల నాయకులు కలిపి 5 వేల కోట్ల రూపాయల విలువైన 580 ఎకరాల భూమిని 100 మంది రైతుల నుంచి కొట్టేస్తున్నారని కవిత షాకింగ్ ఆరోపణలు చేశారు. అంతేకాదు, బంది పోట్లు కూడా పగటి పూట దొంగతనం చేయరని, ఇది అన్యాయం అని అన్నారు. ఆ భూమిలో ఓ బీఆర్ఎస్ నాయకుడికి సంబంధించిన వెంచర్ కు మరో పెద్ద బీఆర్ఎస్ నేత అండ ఉందని ఆరోపించారు. ఆ తర్వాత ఓ పత్రికకు సంబంధించిన ఒక రిపోర్టర్ ఈ విషయం గురించి ఒక చిన్న వార్త రాశారని, అది పొరపాటున పబ్లిష్ అయిందని సెటైర్లు వేశారు.

అది చూసి వెంటనే సదరు రిపోర్టర్ ను మాయం చేశారని, మళ్లీ ఆ విషయం గురించి చుక్క వార్త రాలేదని అన్నారు. అదే వార్త సాక్షి పేపర్ లో వచ్చిందని రైతులు హ్యాపీగా ఫీలయ్యారని, తెల్లారి అదే సాక్షి పేపర్ లో రైతులకు వ్యతిరేకంగా వార్త రాశారని కవిత షాకింగ్ ఆరోపణలు చేశారు. ఇలా ఒక్క రోజులో రైతులకు వ్యతిరేకంగా వార్త రాయడం వెనుక ఏ శక్తులున్నాయి? ఏం సెటిల్మెంట్ జరిగింది…? అని కవిత ప్రశ్నించారు. రామన్న, జగనన్న దోస్తులయిన్రని తాను ఈ మధ్యే తెలుసుకున్నానని కవిత వ్యాఖ్యానించడం విశేషం. వాళ్లిద్దరూ దాదాపుగా పదేళ్లుగా జాన్ జిగిరీ దోస్తులన్న సంగతి రెండు తెలుగు రాష్ట్రాల ప్రజలకు తెలుసని, కవితకు ఈ విషయం తెలియకపోవడం ఏంటని ట్రోల్ చేస్తున్నారు.