Gulte Telugu Telugu Political and Movie News Updates
గన్నవరం మాజీ ఎమ్మెల్యే, వైసీపీ నాయకుడు వల్లభనేని వంశీ రాజకీయాల్లో దూకుడు పెంచారు. ప్రస్తుతం పార్టీని బలోపేతం చేసే దిశగా ఆయన అడుగులు వేస్తున్నారు. ముఖ్యంగా 2024లో జరిగిన ఎన్నికల్లో ఓటమి తర్వాత తనపై కేసులు నమోదు కావడం.. జైలు జీవితం.. అనంతరం.. వచ్చిన స్థానిక ఎన్నికలపై వంశీ ప్రత్యేకంగా దృష్టి పెట్టారు. గన్నవరంలో ఇటీవల జరిగిన వైసీపీ విస్తృత స్థాయి సమావేశంలో వంశీ పాల్గొని, గ్రామస్థాయి నుంచి బలమైన నాయత్వాన్ని తయారు చేసుకోవాలని శ్రేణులకు పిలుపునిచ్చారు.
స్థానిక సంస్థల ఎన్నికల్లో విజయం సాధించడమే లక్ష్యంగా పనిచేయాలని కసితో ఉన్నామని కూడా వంశీ చెప్పారు. ఇదే సమయంలో ప్రభుత్వ విధానాలపై విమర్శలు చేస్తున్నారు. కూటమి ప్రభుత్వం ముఖ్యంగా సీఎం చంద్రబాబు పాలనపై వంశీ తీవ్రస్థాయిలో విమర్శలు చేస్తూ వస్తున్నారు. బడుగు, బలహీన వర్గాల అభివృద్ధికి జగన్ మళ్లీ ముఖ్యమంత్రి కావాల్సిన అవసరం ఉందని ఆయన నొక్కిచెబుతున్నారు. అయితే.. ఇది ఏమేరకు వర్కవుట్ అవుతుందన్నది ప్రశ్నార్థకంగా మారింది.
సెంటిమెంటును పండిస్తూ..
గతంలో వివాదాలు, కేసుల నేపథ్యంలో కొంతకాలం పాటు రాజకీయాలకు దూరంగా ఉంటారనే ప్రచారం జరిగినప్పటికీ, తాజాగా వంశీ పార్టీ కార్యక్రమాల్లో మళ్లీ క్రియాశీలకంగా మారుతున్నారు. ఈ క్రమంలో సెంటిమెంటు రాజకీయాలకు కూడా తెరదీస్తున్నారు. పార్టీ నాయకులకు, కార్యకర్తలకు 24/7 అందుబాటులో ఉంటానని చెబుతున్నారు. ఇదే సమయంలో వైసీపీ హయాంలో పింఛన్లు వచ్చిన వైసీపీ నాయకుల కుటుంబాలకు ప్రస్తుతం పింఛన్లు తీసేశారని.. వీటిపై తాను ప్రత్యక్ష పోరాటం చేస్తానని చెబుతున్నారు. అలాగే ఇళ్ల స్థలాలు కూడా ఇపిస్తానని చెబుతున్నారు.
మారిన మాట..
ఇక, ఇదే సమయంలో వంశీ కొత్త మార్పు కూడా కనిపిస్తోంది. గతంలో ఆయన తీవ్రవ్యాఖ్యలతో టీడీపీ నేతలపై విరుచుకుపడే వారు. కానీ, కేసుల ప్రభావమో ఏమో తెలియదు కానీ.. ఆయన ఇప్పుడు కేవలం విధానపరమైన అంశాలకే పరిమితం అవుతున్నారు. ఎవరినీ పరుషంగా వ్యాఖ్యానించడం లేదు. మరీ ముఖ్యంగా ప్రస్తుత ఎమ్మెల్యే యార్లగడ్డపై పన్నెత్తు మాటకూడా అనకుండానే కార్యక్రమాలు నిర్వహిస్తుండడం గమనార్హం. ఈ మార్పు మంచిదేనని కొందరు అంటుండగా.. మరికొందరు మాత్రం కేసుల ప్రభావం భారీగానే పడిందని చెబుతున్నారు.
