ఏరికోరి తెచ్చుకున్న సుబ్బారాయుడికి దిమ్మ తిరిగే షాకిచ్చిన బాబు

ఏం జరిగినా.. ఎంత జరుగుతున్నా.. కొన్ని కఠిన నిర్ణయాల విషయంలో ఏపీ ముఖ్యమంత్రి చంద్రబాబు వ్యవహరించే తీరు.. ఆయన్ను అమితంగా అభిమానించే వారికి సైతం ఆశ్చర్యాన్ని కలిగిస్తోంది. నిన్నటివరకు ఆయన మంచితనం చేతకానితనంగా… పెద్దరికం… చాదస్తంగా మారిపోయింది అనే భిన్నాభిప్రాయాలను వ్యక్తపరిచారు కొందరు.

చర్యల కత్తి ఝుళిపిస్తే తప్పించి మాట వినని వ్యవస్థలను గాడిలోకి పెట్టాలంటే.. అందుకు తగ్గట్లే వ్యవహరించాలే తప్పించి.. చూసిచూడనట్లుగా వ్యవహరిస్తే మొదటికే మోసం వస్తుందన్న నిజాన్ని చంద్రబాబు ఎప్పుడు గ్రహిస్తారో అనే ఆరోపణలు వచ్చాయి నిన్నటి వరకు. ఈ భిన్నాభిప్రాయాలు, ఆరోపణలకు స్వస్తి పలికారు ముఖ్యమంత్రి చంద్రబాబు.

తిరుపతి తొక్కిసలాట వ్యవహారంలో ఇద్దరు అధికారుల మీద సస్పెన్షన్ ఆదేశాలు జారీ చేయగా… తిరుపతి ఎస్పీగా వ్యవహరిస్తున్న సుబ్బారాయుడి విషయంలో చంద్రబాబు తీసుకున్న నిర్ణయంపై హర్షం వ్యక్తమవుతోంది. దీనికి కారణం.. ఏరి కోరి తెచ్చుకున్న అధికారులు ఎంత అలెర్టుగా పని చేయాలి? ప్రభుత్వానికి చెడ్డపేరు రాకుండా ఉండేందుకు ఎంత శ్రమించాలన్న విషయాన్ని మర్చిపోయినప్పుడు అందుకు తగిన శాస్తి అవసరమన్న విషయాన్ని తన చేతలతో చేసి చూపించారు చంద్రబాబు.

తిరుపతి తొక్కిసలాట ఉదంతాన్ని సీఎం చంద్రబాబు చాలా సీరియస్ గా తీసుకున్నట్లుగా చెబుతున్నారు. చంద్రబాబు ఆగ్రహం మామూలే అయినా.. అది పాల పొంగులా ఉంటుందని చెబుతారు కొందరు. తాజా విషాద ఉదంతాన్ని మాత్రం ఆయన భితన తీరుకు భిన్నంగా వ్యవహరించారన్న మాట వినిపిస్తోంది. దీనికి కారణం తిరుపతి ఎస్పీ సుబ్బారాయుడి మీద వేటు వేయటమే.

2014-19 మధ్య చంద్రబాబు ముఖ్యమంత్రిగా ఉన్నప్పుడు.. ఆయనకు ముఖ్య భద్రతా అధికారిగా సుబ్బరాయుడు పని చేశారు. రాష్ట్రంలో కూటమి ప్రభుత్వం కొలువు తీరిన తర్వాత అదే సుబ్బారాయుడిని తెలంగాణ నుంచి డిప్యుటేషన్ మీద ఏరి కోరి తీసుకొచ్చి.. అత్యంత కీలకమైన తిరుపతి జిల్లాకు ఎస్పీగా నియమించారు.

అలాంటిది.. అంత నిర్లక్ష్యంగా వ్యవహరించిన కారణంగా ఆరు నిండు ప్రాణాలు పోవటమే కాదు.. ప్రభుత్వానికి మాయని మచ్చలా మారిన నేపథ్యంలో ఆయనపై వేటు వేసి, బాధ్యత తీసుకొని దానికి అనుగుణంగా పని చేయకపోతే ఎంతటి వారిని అయినా ఉపేక్షించేది లేదని నిరూపించారు.

ఆ వేటు ఎంత వేగంగా అమలైందంటే.. తిరుపతి పర్యటనలో ఆదేశాలు జారీ చేస్తే.. ఆయన తిరిగి విజయవాడకు చేరుకునేసరికి.. బదిలీ ఉత్తర్వులూ జారీ అయిపోయాయి. కీలక స్థానాల్లో ఉన్న అధికారులు.. చంద్రబాబుతో సన్నిహిత సంబంధాలు ఉన్న వారు.. పని విషయంలో నిర్లక్ష్యంగా వ్యవహరించినా.. తమను ఏమీ అనరన్నట్లుగా వ్యవహరించే వారికి తాజా నిర్ణయంతో వార్నింగ్ ఇచ్చేసినట్లుగా చెబుతున్నారు.

ఏమైనా.. బాబులో ఈ స్థాయిలో ఆగ్రహావేశాలు చాలా రోజుల తర్వాత చూసినట్లుగా కొందరు రాజకీయ విశ్లేషకులు వ్యాఖ్యానిస్తున్నారు.