నభూతో అనిపించేలా మోక్షు లాంచింగ్

నందమూరి అభిమానులు ఎన్నో ఏళ్ల నుంచి ఎదురు చూస్తున్న ప్రకటన రానే వచ్చింది. నందమూరి బాలకృష్ణ ముద్దుల తనయుడు మోక్షజ్ఞ అరంగేట్ర సినిమా ఎట్టకేలకు ఖరారైంది. శుక్రవారం మోక్షజ్ఞ పుట్టిన రోజు సందర్భంగా సరికొత్త పోస్టర్‌తో ఈ సినిమాను అనౌన్స్ చేశారు.

ప్రశాంత్ వర్మ సినిమాటిక్ యూనివర్శ్‌లో భాగంగా విజువల్ వండర్‌గా ఈ సినిమాను తీర్చిదిద్దబోతున్నారు. మోక్షజ్ఞ సోదరి తేజస్విని ఈ చిత్రంలో నిర్మాణ భాగస్వామి కావడం.. బాలయ్య కెరీర్లో బిగ్గెస్ట్ హిట్లలో ఒకటైన ‘లెజెండ్’ పేరుతోనే నిర్మాణ సంస్థను నెలకొల్పడం విశేషం. ఐతే శుక్రవారం కేవలం పోస్టర్‌తోనే సరిపెట్టారు. ఈ రోజుకు అనౌన్స్‌మెంట్ మాత్రమే. మోక్ష తొలి చిత్రం లాంచింగ్ వ్యవహారం వేరుగా ఉండబోతోంది.

బాలయ్య ప్రత్యేకంగా ముహూర్తం పెట్టించి మోక్షు తొలి సినిమా ముహూర్త వేడుకను అంగరంగ వైభవంగా చేయడానికి సన్నాహాలు చేస్తున్నట్లు సమాచారం. ఇండస్ట్రీ నుంచి అతిరథ మహారథులను పిలిచి.. అభిమానులను కూడా ఆహ్వానించి ఘనంగా ఈ కార్యక్రమాన్ని చేయడానికి చూస్తున్నారట.

అభిమానులు ఎన్నో ఏళ్ల పాటు ఎదురు చూసిన అరంగేట్రం కావడం.. ఈ సినిమాకు ఆరంభం నుంచే భారీ హైప్ తీసుకురావడం అవసరమని భావించి లాంచింగ్ నెవర్ బిఫోర్ అన్నట్లుగా చేయాలని అనుకుంటున్నారట.

అక్టోబరులో మంచి ముహూర్తం చూసి ఈ వేడుక చేస్తారని.. వెంటనే రెగ్యులర్ షూటింగ్ కూడా మొదలైపోతుందని.. వచ్చే ఏడాది సినిమా రిలీజవుతుందని నందమూరి కుటుంబ వర్గాల సమాచారం.