మిరల్ రిపోర్ట్ ఏంటి

నిన్న ఎలాగూ కొత్త తెలుగు సినిమాలు లేవనే కారణంగా మిరల్ అనే డబ్బింగ్ మూవీని రిలీజ్ చేశారు. ప్రేమిస్తేతో టాలీవుడ్ ప్రేక్షకులకు దగ్గరై తర్వాత పూర్తిగా తమిళంకే అంకితమైపోయిన భరత్ హీరో. హారర్ జానర్ కావడంతో ఎంతో కొంత వర్కౌట్ అవుతుందనే ఉద్దేశంతో థియేటర్లకు తీసుకొచ్చారు. విచిత్రం ఏంటంటే దీని ఒరిజినల్ వెర్షన్ 2022లో విడుదలయ్యింది. ఓటిటి ద్వారా అందుబాటులో ఉండగా హిందీ అనువాదం ఎంచక్కా యూట్యూబ్ లో ఉచితంగా దొరుకుతోంది. అయినా సరే ఇంత ధీమాగా ఈ మిరల్ ని మనకోసం తీసుకొచ్చారంటే అసలు మ్యాటర్ ఏముందో చూద్దాం.

ప్రేమించి పెళ్లి చేసుకున్న హరి (భరత్), రమ (వాణి భోజన్) లది అన్యోన్య దాంపత్యం. సంతానం ఒక్కగానొక్క కొడుకు సాయి (మాస్టర్ అంకిత్). ఎవరో భర్తను చంపుతున్నట్టు రమకు భయంకరమైన కలలు వస్తుంటాయి. దీనికి పరిహారంగా పెద్దల సలహా మేరకు కులదైవంకు మొక్కులు చెల్లించడం కోసం స్వగ్రామానికి వెళ్తారు. పూజలు పూర్తి చేసుకుని తిరిగి వెళ్లే క్రమంలో రమ ఊహించినట్టే నిజంగానే హరి ఫ్యామిలీ మీద దాడి జరుగుతుంది. అనూహ్య సంఘటనలు చోటు చేసుకుంటాయి. ఇంతకీ వీళ్ళ కుటుంబం మీద దెయ్యాలు పగ పట్టేందుకు కారణాలు ఏంటనేది కథలో అసలు పాయింట్.

దర్శకుడు శక్తివేల్ కామెడీ జోలికి వెళ్లకుండా సీరియస్ హారర్ కి కట్టుబడాలనే ఆలోచన బాగుంది కానీ దాన్ని సరైన రీతిలో కట్టిపడేసేలా తీయడంలో విఫలమయ్యాడు. అరగంటకు సరిపడే లైన్ ని పూర్తి నిడివి సినిమాగా పొడిగించే క్రమంలో ఆసక్తి కలిగించని సన్నివేశాలు, రొటీన్ ఎలిమెంట్స్, బ్యాలన్స్ కుదరని పాత్రల చిత్రణతో విసిగించేశాడు. పైగా క్లైమాక్స్ ట్విస్టు ఏదో మతిపోయే రేంజ్ లో ఉంటుందని ఆశిస్తే ఆడియన్స్ ని మోసం చేసే తరహాలో ముగించడం ఎంత మాత్రం మింగుడుపడదు. ఎంత హారర్ ప్రియులైనా సరే విపరీతమైన ఓపికని డిమాండ్ చేసే మిరల్ డీసెంట్ ఛాయస్ గా నిలవలేకపోయింది.