తెలుగు సినిమాలే సూపరంటున్న మృణాల్

సీతారామం సినిమాలో సీత పాత్రతో తెలుగు ప్రేక్షకుల హృదయాలను దోచింది మృణాల్ ఠాకూర్. ఈ మధ్య కాలంలో ఓ హీరోయిన్ ఇంతగా మెస్మరైజ్ చేయడం జరగలేదనే చెప్పాలి. చాలా ఏళ్ల పాటు ఈ పాత్రను మన ప్రేక్షకులు గుర్తుంచుకుంటారనడంలో సందేహం లేదు.

ఆ పాత్రలో మృణాల్‌కు ఎంతగా కనెక్ట్ అయ్యారంటే.. బాలీవుడ్లో ఆమె గ్లామర్ రోల్స్‌లో అందాలు ఆరబోస్తుంటే మన వాళ్లకు అస్సలు రుచించడం లేదు. ‘సీతారామం’ తర్వాత ఆచితూచి సినిమాలు ఎంచుకుంటున్న మృణాల్.. గత ఏడాది ‘హాయ్ నాన్న’ అనే మరో మంచి సినిమాతో పలకరించింది. అందులోనూ అందంగా కనిపిస్తూనే మంచి పెర్ఫామెన్స్ ఇచ్చింది మృణాల్. త్వరలోనే రాబోతున్న ‘ఫ్యామిలీ స్టార్’లో కూడా ఆమెకు మంచి పాత్రే పడ్డట్లుంది.

క్యారెక్టర్ల విషయంలో మృణాల్ సైతం తెలుగు సినిమాలతో బాగా కనెక్ట్ అయినట్లు కనిపిస్తోంది. తాజాగా ఒక ఇంటర్వ్యూలో ఆమె బాలీవుడ్‌తో పోల్చి మరీ తెలుగు సినిమాలకు ఎలివేషన్ ఇవ్వడం విశేషం. తనకు సౌత్‌లోనే మంచి పాత్రలు వస్తున్నాయని.. అలాంటి పాత్రలు బాలీవుడ్లో తనకు దొరకడం లేదని ఆమె పేర్కొంది.

పేరుకు సౌత్ అంది కానీ.. ఆమె వరుసగా సినిమాలు చేస్తోంది తెలుగులోనే కాబట్టి టాలీవుడ్‌కే ఎలివేషన్ ఇచ్చినట్లు భావించవచ్చు. ఇక బాలీవుడ్లో తనకు కెరీర్ ఆరంభంలో అవమానాలు ఎదురైనట్లు కూడా మృణాల్ చెప్పింది. తనను పల్లెటూరి పిల్ల అన్నారని.. గ్లామర్ రోల్స్‌కు సరిపోనని తీసి పడేశారని.. అలా రిజెక్షన్ కు గురైన తాను తర్వాత తనేంటో రుజువు చేసుకున్నానని మృణాల్ చెప్పింది.