రియా చక్రవర్తి అరెస్ట్.. కానీ ట్విస్ట్ ఏంటంటే?

కొన్ని రోజులుగా అనుకుంటున్నదే.. కాకపోతే కొంచెం ఆలస్యంగా జరిగింది. బాలీవుడ్ యువ నటుడు సుశాంత్ సింగ్ రాజ్‌పుత్ అనుమానాస్పద మృతికి సంబంధించిన కేసులు అనేక ఆరోపణలు ఎదుర్కొన్న అతడి మాజీ ప్రేయసి రియా చక్రవర్తి అరెస్టయింది. కానీ ఆమె అరెస్టయింది సుశాంత్ మృతికి సంబంధించిన వ్యవహారంలో కాదు. మాదక ద్రవ్యాల కేసులో. ఆమెను అరెస్టు చేసింది కూడా జాతీయ మాదక ద్రవ్యాల నిరోధక సంస్థనే. సుశాంత్ కేసుకు సంబంధించి సీబీఐ అధికారుల విచారణలో భాగంగా రియా చక్రవర్తి డ్రగ్స్ వాడేదని, బాలీవుడ్లో తరచుగా డ్రగ్స్ వాడే బ్యాచ్‌లో రియా కూడా ఒకరని.. ఆమె సోదరుడికి కూడా ఇందులో ప్రమేయం ఉందని వెల్లడైన సంగతి తెలిసిందే. దీంతో డ్రగ్స్ నిరోధక అధికారులు కొన్ని రోజులుగా రియాను విచారిస్తున్నారు.

తాజాగా విచారణకు హాజరైనపుడే రియా నుంచి కీలక సమాచారం రాబట్టారని, ఆమె ఈ కేసులో ఇరుక్కోవడం ఖాయమని వార్తలొచ్చాయి. ఈ నేపథ్యంలోనే మంగళవారం రియాను అధికారులు అరెస్టు చేశారు. బాలీవుడ్ ప్రముఖులకు మాదక ద్రవ్యాలు సరఫరా చేసే వ్యక్తులు రియా పేరు చెప్పారని.. ఆమెతో పాటు పలువురి పేర్లు బయట పడ్డాయని.. త్వరలో మరికొందరు అరెస్టయ్యే అవకాశముందని బాలీవుడ్ మీడియా వర్గాలు చెబుతున్నాయి. ఐతే ఇంతకుముందు టాలీవుడ్లో సైతం ఇలా పలువురికి డ్రగ్స్‌తో సంబంధం ఉందని హైదరాబాద్ పోలీసు అధికారులు నోటీసులివ్వడం, విచారించడం చేశారు. అప్పట్లో అదో పెద్ద సంచలనం అయింది. కానీ ఆ తర్వాత ఈ కేసులో ఏ పురోగతీ లేదు. ఆ కేసు పక్కకు వెళ్లిపోయింది. ఎలాంటి చర్యలూ లేవు. మరి బాలీవుడ్లో సైతం ఊరికే కొన్ని రోజులు హడావుడి చేసి వదిలేస్తారా.. లేక నిజంగా చర్యలు చేపడతారా అన్నది చూడాలి.