తెలుగు బరి నుంచి తప్పుకున్న అయలాన్

ప్రముఖ డిస్ట్రిబ్యూటర్లు డబ్బింగ్ వెర్షన్ హక్కులు కొనడంతో జనవరి 12నే అయలాన్ విడుదలవుతుందనే ప్రచారానికి చెక్ పడిపోయింది. పండక్కు రిలీజ్ చేయడం లేదని, వేరే మంచి డేట్ చూసుకుని ప్లాన్ చేస్తామని దిల్ రాజు చెప్పడంతో ఈ టాపిక్ కి ఫుల్ స్టాప్ వచ్చింది. ఉత్తరాంధ్ర, నైజామ్ థియేట్రికల్ రైట్స్ ని ఆయన, మిగిలిన ఏరియాలను మరికొందరు పంపిణీదారులు కొనడంతో ఖచ్చితంగా శివ కార్తికేయన్ సినిమా పండక్కి వస్తుందనే టాక్ ట్రేడ్ లో వినిపించింది. అయితే ఆచరణలో అదంత సులభంగా కాదని తేలిపోవడంతో ఫైనల్ గా రేసు నుంచి పక్కకు తీసుకొచ్చారు.

ఇదంతా ముందే ఊహించే కెప్టెన్ మిల్లర్ సైతం ఏపీ తెలంగాణ రిలీజ్ గురించి ఆలోచించలేదు. అయలాన్ రావడం మీద కుడా అనుమానాలు తలెత్తాయి కానీ ఒక్క రోజులో జరిగిన పరిణామాలు కొత్త టాక్ ని సృష్టించాయి. ఏదైతేనేం ఇప్పుడిది పూర్తిగా తప్పుకోవడం ఒకరకంగా ఇరువైపులా మంచిదే. మహేష్ బాబు, వెంకటేష్, నాగార్జున, హనుమాన్ లకు పోటీ ఇచ్చే రేంజ్ శివ కార్తికేయన్ కు లేదు. అయితే వరుణ్ డాక్టర్, కాలేజీ డాన్ సక్సెస్ ల వల్ల ఇక్కడ మంచి మార్కెట్ ఏర్పడింది. ప్రిన్స్ ఫ్లాప్ అయినా, మహావీరుడు యావరేజ్ గా ఆడినా ఓపెనింగ్స్ పరంగా రెండూ నిరాశపరచలేదు.

తమిళంలో అయలాన్ కు మంచి టాక్ వస్తే కాస్త లేట్ గా ఇక్కడ రిలీజ్ చేసినా ఇబ్బంది లేదు. ఏదైనా తేడా కొడితే ఇబ్బందులు తప్పవు. ధనుష్ కెప్టెన్ మిల్లర్ కు సైతం ఈ అంశమే కీలకం కానుంది. భారీ విజువల్ ఎఫెక్ట్స్ రూపొందిన అయలాన్ కు కనీసం తెలుగు పేరు పెట్టకుండా అదే టైటిల్ ని యధాతథంగా కొనసాగిస్తున్నారు. ఒక వారం రోజులు అయ్యాక ప్రత్యేకంగా హైదరాబాద్ వచ్చి తన సినిమాను ప్రమోట్ చేసుకునే ప్లాన్ లో ఉన్నాడు శివ కార్తికేయన్. జనవరి 19 లేదా 26 ఈ రెండు ఆప్షన్లలో ఒకటి ఎంచుకుని మిల్లర్ తో పాటు ఒకేసారి మన థియేటర్లలో అడుగు పెట్టే సూచనలు కనిపిస్తున్నాయి.