సలార్ కు బాహుబలి తరహా ముగింపు?

సలార్ బాక్స్ ఆఫీస్ విందుకు ఇంకొక రోజే సమయం ఉంది. ఈ సినిమాపై అంచనాలు ఏ స్థాయిలో ఉన్నాయో కొత్తగా చెప్పాల్సిన పనిలేదు. ఒకరకంగా చెప్పాలంటే బాహుబలి తర్వాత ప్రభాస్ నటించిన చిత్రాల్లో దీనికే అత్యంత హైప్ ఉంది. అడ్వాన్స్ బుకింగ్స్ చూస్తుంటే మళ్ళీ బాహుబలి రోజులే గుర్తొస్తున్నాయి. బాహుబలి, సలార్ రెండు భిన్నమైన చిత్రాలే అయినప్పటికీ హైప్, అడ్వాన్స్ బుకింగ్స్ విషయంలోనే కాక మరో విషయంలోనూ పోలిక ఉండడం విశేషం.

బాహుబలి లాగే ఇది కూడా రెండు భాగాలుగా తెరకక్కనుండగా.. బాహుబలి-1 లాగే సలార్-1కు కూడా ముగింపులో ఒక కొసమెరుపు ఉండబోతున్న విషయం వెల్లడైంది. స్వయంగా దర్శకుడు ప్రశాంత్ నీలే ఈ విషయాన్ని వెల్లడించాడు.

బాహుబలి ఫస్ట్ పార్ట్ ను బాహుబలిని కట్టప్ప ఎందుకు చంపాడు అనే ప్రశ్నతో ముగించడం బాహుబలి-2 కు హైప్ పెంచడానికి ఎంతగా ఉపయోగపడిందో తెలిసిందే. దాదాపు ఇలాగే సలార్ ను కూడా ముగించబోతున్నట్టు ప్రశాంత్ తెలిపాడు. ఒక ఎపిసోడ్ తర్వాత ఇంకొక ఎపిసోడ్ రాబోతున్నప్పుడు ఫస్ట్ ఎపిసోడ్ ను ఒక కొసమెరుపుతో ముగించి తర్వాత ఎపిసోడ్ మీద ఆసక్తి పెంచడం సహజమే అని.. అలాగే సలార్ సెకండ్ పార్ట్ కోసం ప్రేక్షకులు ఎదురుచూసేలా ఒక హైలెట్ ఉందని ప్రశాంత్ చెప్పాడు.

సినిమాలో మేజర్ హైలైట్ ఏంటి అని సలార్ ప్రమోషనల్ ఇంటర్వ్యూలో రాజమౌళి అడిగిన ప్రశ్నకు సమాధానంగా ఈ విషయం వెల్లడించాడు. క్లైమాక్స్ లో సెకండ్ పార్ట్ కు దారి తీసేలా వచ్చే ట్విస్ట్ హైలెట్ గా ఉంటుందని.. సలార్-2 చూడాలా వద్దా, అసలు ఎందుకు చూడాలి అనేది అదే డిసైడ్ చేస్తుందని ప్రశాంత్ చెప్పడం ద్వారా క్లైమాక్స్ విషయంలో అభిమానుల్లో క్యూరియాసిటీని అమాంతం పెంచేశాడు.