మా అధ్యక్షుడిగా విష్ణు సున్నా- ప్రకాష్ రాజ్

రెండేళ్ల కిందట ‘మూవీ ఆర్టిస్ట్స్ అసోసియేషన్’ (మా) ఎన్నికలు ఎంత వాడి వేడిగా జరిగాయో తెలిసిందే. సాధారణ ఎన్నికల స్థాయిలో ఇవి చర్చనీయాంశం అయ్యాయి. హోరాహోరీగా సాగిన పోరులో ప్రకాష్ రాజ్ మీద మంచు విష్ణు గెలిచి ‘మా’ అధ్యక్షుడు అయ్యాడు. ఎన్నికల అనంతరం కూడా డ్రామా కొనసాగి.. ప్రకాష్ రాజ్ తన సభ్యత్వానికి రాజీనామా చేయడం.. ఆయన ప్యానెల్ నుంచి గెలిచిన సభ్యులు కార్యవర్గం నుంచి తప్పుకోవడం లాంటి పరిణామాలు జరిగాయి.

ఆ తర్వాత రెండు వైపుల నుంచి పెద్దగా సౌండ్ లేదు. ‘మా’ కార్యకలపాలపై మీడియాలో కూడా పెద్దగా చర్చ లేదు. కాగా మళ్లీ ‘మా’ ఎన్నికలకు సమయం దగ్గర పడుతుండగా.. మంచు విష్ణు మీద ప్రకాష్ రాజ్ ఒక మీడియా సంస్థ ఇంటర్వ్యూలో విమర్శలు గుప్పించడం గమనార్హం. ‘మా’ అధ్యక్షుడిగా విష్ణు పనితీరు సున్నా అని ఆయన వ్యాఖ్యానించారు.

‘‘రెండేళ్లు అయిపోయాయి. కనీసం ఒక జనరల్ బాడీ మీటింగ్ కూడా పెట్టలేదు. అలాగే ‘మా’కు ఇప్పటికీ సొంత భవనం లేదు. మంచు విష్ణు ఈ రెండేళ్లలో చేసిందేమీ లేదు. విష్ణుని ఎన్నుకున్న సభ్యులు అందరూ ఇప్పుడు ఆలోచించాలి. రెండేళ్లలో అతను ఏం చేశాడో చెప్పాలి. కనీసం ఒక మీటింగ్ కూడా పెట్టలేకపోయాడు. బోగస్ ఓట్లు, అలాగే బయటి నుంచి వచ్చిన చాలామంది ఓట్లు వేయడం వల్ల అతను గెలిచాడు.

కానీ రెండేళ్లలో అతడి పని తీరు సున్నా’’ అని ప్రకాష్ రాజ్ వ్యాఖ్యానించాడు. వచ్చే ‘మా’ ఎన్నికల్లో తాను పోటీ చేస్తానో లేదో తెలియదని.. ఎందుకంటే జాతీయ అంశాలపై తన దృష్టి ఉందని.. వీటన్నింటికీ తోడు సినిమాల పరంగా తనకు చాలా బిజీ షెడ్యూల్ ఉందని ప్రకాష్ రాజ్ అన్నారు. విష్ణు మీద విమర్శలను బట్టి ప్రకాష్ రాజ్ మళ్లీ ఎన్నికల బరిలో నిలుస్తాడని అనిపిస్తోంది కానీ.. తానెంత బిజీనో చెబుతుంటే మాత్రం సందేహాలు కలుగుతున్నాయి.