భగవంత్ కేసరిపై సందేహాలు అక్కర్లేదు

తాజా రాజకీయ పరిణామాల దృష్ట్యా బాలకృష్ణ తెలుగుదేశం వ్యవహారాలతో బిజీ కావడంతో భగవంత్ కేసరి వాయిదా పడొచ్చనే ప్రచారం ఊపందుకుంది. అయితే ఇందులో ఎలాంటి నిజం లేదని యూనిట్ మాట. కేవలం నాలుగైదు రోజుల వర్క్ మాత్రమే పెండింగ్ ఉందని, కొంత సమయం బాలయ్య కేటాయిస్తే వీలైనంత వేగంగా పూర్తి చేసేందుకు దర్శకుడు అనిల్ రావిపూడి సర్వం సిద్ధం చేసినట్టు చెబుతున్నారు. తమన్ రీ రికార్డింగ్ పనులు మొదలుపెట్టేశాడు. చివరి నిమిషం వరకు ఒత్తిడి లేకుండా తనవైపు నుంచి ఆలస్యం జరగకుండా పక్కా ప్లానింగ్ తో ఉన్నాడు.

విడుదలకు ఇంకో నెల రోజులు మాత్రమే సమయం ఉంది కనక పనులను పరుగులు పెట్టించాలి. అయితే చంద్రబాబునాయుడు జైల్లో ఉన్న తరుణంలో ఒకవేళ దగ్గరలో ఆయన కనక బయటికి రాకపోతే భగవంత్ కేసరి ఈవెంట్లు నిర్వహించే విషయంలో సందిగ్దత ఎదురు కావొచ్చు. కానీ రిమాండ్ విధించింది రెండు వారాలే కాబట్టి ఆ తర్వాత ఖచ్చితంగా బెయిల్ వస్తుందనే నమ్మకం టిడిపి లీగల్ సెల్ వ్యక్తం చేస్తోంది. అలా అయితే హ్యాపీగా ఎన్ని వేడుకలైనా చేసుకోవచ్చు. ఇదంతా రాజకీయ అంశాలతో ముడిపడటం వల్ల భగవంత్ కేసరి బృందం ఓపిగ్గా ఎదురు చూస్తోంది.

ఎట్టి పరిస్థితుల్లోనూ ఈ సినిమా దసరా బరి నుంచి తప్పుకోవడం ఉండదు. బయ్యర్లకు మరోసారి అంతర్గతంగా కన్ఫర్మేషన్ ఇచ్చేశారట. లియో, టైగర్ నాగేశ్వరరావు నుంచి గట్టి పోటీ ఉన్న నేపథ్యంలో పబ్లిసిటీని ప్రత్యేకంగా ప్లాన్ చేయబోతున్నారు. మొన్న వదిలిన గణేష్ పాటకు మిశ్రమ స్పందనే దక్కింది. విజువల్ గా తెరమీద చూశాక నెక్స్ట్ లెవెల్ లో ఉంటుందని టీమ్ ఊరిస్తోంది. ఇంకా రిలీజ్ చేయాల్సిన సాంగ్స్ ఉన్నాయి. ట్రైలర్ కట్ సిద్ధం చేయాలి. ప్రీ రిలీజ్ ఈవెంట్ కి వేదిక, ఏర్పాట్లు చూసుకోవాలి. ఎన్ని ఒత్తిళ్లు ఉన్నా టార్గెట్ చేరుకోవడం పక్కా అంటున్నారు. సో ఇంకే అనుమానం అక్కర్లేదు.