హిందూ సెంటిమెంటుతో హిట్లు కొడుతున్నారు

హిందూ సెంటిమెంటుతో హిట్లు కొడుతున్నారుకార్తికేయ 2 అటు నార్త్ లోనూ ఇంత మంచి రెస్పాన్స్ దక్కించుకోవడానికి కారణం నిఖిల్ కున్న ఇమేజ్ కాదు, ప్యాన్ ఇండియాగా దాన్ని ప్రమోట్ చేసిన తీరూ కాదు. శ్రీకృష్ణుడి తత్వాన్ని బలంగా చూపించి భగవద్గీతలోని ఆయన సారాన్ని ఫాంటసీ డ్రామాకి జోడించిన వైనం ఉత్తరాది ప్రేక్షకులను విపరీతంగా ఆకట్టుకుంటోంది, మాములుగా టీవీ సీరియల్ లో కృష్ణుడి క్యారెక్టర్ నే అమితంగా ఇష్టపడే ఆడియన్స్ కి ఇలా బిగ్ స్క్రీన్ మీద గ్రాఫిక్స్ సహాయంతో క్వాలీటీ కంటెంట్ ని ప్రెజెంట్ చేస్తే థియేటర్లకు రాకుండా ఉంటారా. ఇప్పుడదే జరిగింది.

నిజానికి మన సినిమాలు అక్కడ ఇంతగా వర్కౌట్ అవ్వడానికి కారణం హిందూ సెంటిమెంటే. ఆర్ఆర్ఆర్ రిలీజైనప్పుడు రామ్ చరణ్ ని అల్లూరి సీతారామరాజుగా చూపిస్తే ఆ గెటప్ చూసి ఢిల్లీ ముంబై జనాలు శ్రీరాముడితో పోల్చుకున్నారు. చాలా చోట్ల క్లైమాక్స్ లో ఆ పాత్ర ఎంట్రీకి జైశ్రీరామ్ అని నినాదాలు చేయడం వీడియోల రూపంలో బయటికి వచ్చింది. అఖండ హిందీలో డబ్బింగ్ చేయకపోయినా హాట్ స్టార్ లో సబ్ టైటిల్స్ సహాయంతో చూసినవాళ్లు అఘోరాగా బాలయ్య వివరించిన హిందూ మత సారాన్ని గొప్పగా మెచ్చుకున్నారు.

చూస్తుంటే రాబోయే రోజుల్లో మన దర్శకులు ఈ అంశాన్ని దృష్టిలో పెట్టుకుని కథలు రాసుకునేలా ఉన్నారు. ఇంకొందరు ఒక అడుగు ముందుకు వేసి ఒకవేళ  చిరంజీవి అంజి కనక ఇప్పుడు రిలీజై ఉంటే ఖచ్చితంగా బ్లాక్ బస్టర్ అయ్యేదని అంచనా వేస్తున్నారు. శ్యామ్ ప్రసాద్ రెడ్డి, కోడి రామకృష్ణలు ఎప్పుడో అడ్వాన్స్ గా ఆలోచించారు కానీ వాటి ఫలితాలు ఇప్పుడు కనిపిస్తున్నాయని కామెంట్ చేస్తున్నారు. అయోధ్య ఆలయ నిర్మాణం పూర్తయ్యేనాటికి ప్రభాస్ ఆది పురుష్ తో సహా మరికొన్ని ఈ సెంటిమెంట్ ని క్యాష్ చేసుకోవడం ఖాయం.