రాజశేఖర్ కూతుళ్లు అక్కడైనా కొడతారా?

హీరోల కొడుకులు హీరోలవడం సాధారణమే. కానీ హీరోల కూతుళ్లు హీరోయిన్లవడం అరుదే. చాలామంది సినీ రంగంలోకి వచ్చినా.. వేరే విభాగాల వైపు వెళ్తుంటారు. కానీ రాజశేఖర్ కూతుళ్లు మాత్రం ఇద్దరూ నటన వైపే అడుగులు వేశారు.

కానీ ఈ ఇద్దరికీ అంతగా కలిసి రావడం లేదిక్కడ. రాజశేఖర్ పెద్ద కూతురు శివాని ‘2 స్టేట్స్’ రీమేక్‌తో కథానాయికగా పరిచయం కావాల్సింది. కానీ ఆ సినిమా మధ్యలోనే ఆగిపోయింది. ఆ తర్వాత ‘అద్భుతం’ అని సినిమా చేస్తే అది చాలా ఆలస్యంగా.. ఈ మధ్యే ఓటీటీలో రిలీజైంది.

దానికి స్పందన అంతంతమాత్రమే. ఆమె ప్రధాన పాత్ర పోషించిన మరో సినిమా ‘డబ్ల్యూడబ్ల్యూడబ్ల్యూ’కు కూడా అంతగా బజ్ రాలేదు. దాన్ని కూడా ఓటీటీలోనే రిలీజ్ చేస్తున్నారు. ఇక రాజశేఖర్ చిన్న కూతురు శివాత్మిక తొలి చిత్రం ‘దొరసాని’ డిజాస్టర్ కావడం తెలిసిందే. మరో సినిమా ‘రంగమార్తాండ’ ఎంతకీ విడుదల కావట్లేదు. ఇదీ టాలీవుడ్లో ఈ ఇద్దరు వారసురాళ్ల పరిస్థితి.

ఐతే తెలుగులో కెరీర్ అంతంతమాత్రంగా ఉండగా.. వీళ్లిద్దరికీ తమిళంలో అవకాశాలు రావడం విశేషం. వీళ్లిద్దరూ నటించిన చిత్రాలు రెండు వారాల వ్యవధిలో తమిళనాట విడుదలవుతున్నాయి. శివాత్మిక తమిళంలో కథానాయికగా పరిచయం కానున్న ‘ఆనందం విలయాడుం వీడు’ ఈ నెల 24న థియేటర్లలోకి దిగబోతోంది.

ఇందులో కార్తీక్ తనయుడు గౌతమ్ కార్తీక్ హీరో. ఇది పక్కా గ్రామీణ వాతావరణంలో నడిచే అరవ మార్కు మాస్ మూవీ. ఇందులో శివాత్మిక పల్లెటూరి అమ్మాయిగా నటించింది. ఈ సినిమా ప్రోమోలైతే బాగానే అనిపిస్తున్నాయి. మరోవైపు శివాని తమిళంలో ‘అన్బరివు’ అనే సినిమాతో ఎంట్రీ ఇస్తోంది. ఇందులో సంగీత దర్శకుడు హిప్ హాప్ తమిళ హీరో.

అతను ఇప్పటికే హీరోగా నటించిన సినిమాలు మంచి ఫలితాన్నందుకున్నాయి. ఈ కొత్త చిత్రంలో అతను ద్విపాత్రాభినయం చేస్తుండగా.. శివాని మోడర్న్ అమ్మాయిగా పొట్టి డ్రెస్సుల్లో సెక్సీగా కనిపిస్తోంది. ఈ చిత్రం జనవరి 7న హాట్ స్టార్ ద్వారా రిలీజవుతోంది. శివాని మూడో చిత్రం కూడా ఓటీటీ బాటే పట్టడం విశేషం. మరి తెలుగులో ఆకట్టుకోలేకపోయిన రాజశేఖర్ కూతుళ్లు తమిళంలో అయినా తమదైన ముద్ర వేస్తారేమో చూడాలి.