బన్నీ దాన్ని క్యాన్సిల్ చేసినట్లేనా?

అల్లు అర్జున్ ఫ్యూచర్ ప్రాజెక్టుల విషయంలో ఎప్పటికప్పుడు ప్రణాళికలు మారిపోతున్నట్లే ఉన్నాయి. ‘పుష్ప’ పార్ట్-1 పూర్తి చేశాక.. ‘పార్ట్-2’ చేయడానికి ముందు అతను ఐదారు నెలలు గ్యాప్ తీసుకుంటాడని.. వేరే సినిమాలో నటిస్తాడని.. ఆ సినిమా పూర్తయ్యాక ‘పుష్ప-2’ సెట్స్‌లో అడుగు పెడతాడని ఆ మధ్య వార్తలొచ్చాయి. బన్నీ సన్నిహిత వర్గాల నుంచి.. అలాగే ‘పుష్ప’ యూనిట్ నుంచి కూడా మీడియాకు ఈ రకమైన సమాచారమే వచ్చింది.

బన్నీ ఈ గ్యాప్‌లో చేయబోయే సినిమా ‘ఐకాన్’ అని కూడా చెప్పుకున్నారు. ఈ సినిమా ప్రి ప్రొడక్షన్ కార్యక్రమాలు జోరుగా జరుగుతున్నట్లు కూడా వార్తలొచ్చాయి. కానీ తీరా చూస్తే ‘ఐకాన్’ మరోసారి హోల్డ్‌లో పడుతున్నట్లు గుసగుసలు వినిపించాయి. ఈ విషయంలో ఇప్పుడు పూర్తిగా క్లారిటీ వచ్చినట్లే కనిపిస్తోంది. ‘పుష్ప-2’ షూటింగ్ గురించి ఈ చిత్ర నిర్మాతలు ఇచ్చిన అప్‌డేటే ఇందుకు రుజువు.

‘పుష్ప-2’ షూటింగ్ ఫిబ్రవరి నుంచే మొదలు కానున్నట్లు మైత్రీ మూవీ మేకర్స్ అధినేతలు క్లారిటీ ఇచ్చేశారు. అంటే ‘పుష్ప-1’ విడుదల తర్వాత బన్నీ ఇంకో సినిమా చేసే ఉద్దేశమేమీ లేదన్నట్లే. వచ్చే రెండు నెలలు అతను విశ్రాంతి తీసుకోబోతున్నాడన్నమాట. ‘పుష్ప’ లుక్‌ను కూడా బన్నీ అలాగే మెయింటైన్ చేస్తాడని.. జుట్టు, గడ్డం తీయబోడని తెలుస్తోంది. మళ్లీ ఈ స్థాయిలో జుట్టు, గడ్డం పెంచాలంటే నెలల సమయం పడుతుంది కాబట్టి బన్నీ ప్రస్తుత లుక్‌ను అలాగే మెయింటైన్ చేయబోతున్నాడు. మధ్యలో వేరే సినిమా ఏదీ పెట్టుకోవట్లేదు.

కాబట్టి ‘ఐకాన్’ అటకెక్కేసినట్లే అనుకోవాలి. ‘పుష్ప-2’ కూడా అయ్యాక తన తర్వాతి సినిమాపై బన్నీ ఏదో ఒకటి తేల్చుకునే అవకాశముంది. కొరటాల శివతో అనుకున్న సినిమా మీదా ఇప్పుడు అయోమయం నెలకొంది. బన్నీ ‘పుష్ప-2’ పూర్తి చేసి.. మరోవైపు కొరటాల తారక్ సినిమాను అవగొట్టి.. ఇద్దరికీ అప్పుడు కుదిరితే తమ కాంబినేషన్లో సినిమా చేయడానికి రెడీ అవుతారేమో.