బాయ్ ఫ్రెండ్ ను పెళ్లాడిన లేడీ కమెడియన్!

తమిళ ఇండస్ట్రీకి చెందిన ప్రముఖ లేడీ కమెడియన్ విద్యుల్లేఖ రామన్ తెలుగు వారికి కూడా సుపరిచితురాలే. మొదటి డబ్బింగ్ సినిమాల ద్వారా తెలుగు ప్రేక్షకులను అలరించిన ఈమె ఆ తరువాత కొన్ని స్ట్రెయిట్ సినిమాల్లో నటించింది. ‘సరైనోడు’ లాంటి సినిమాలో విద్యుల్లేఖ కామెడీకి నవ్వకుండా ఉండలేం. తన లుక్స్, డైలాగ్స్ తో ప్రేక్షకులను తెగ నవ్విస్తుంటుంది. చూడడానికి కాస్త బొద్దుగా ఉండే ఈ బ్యూటీ తన శరీరాకృతిపై దృష్టి పెట్టి జిమ్ లో కసరత్తులు చేసి స్లిమ్ గా తయారైంది.

ఆమె స్లిమ్ లుక్ చూసిన నెటిజన్లు షాకయ్యారు. అంతగా ఛేంజ్ ఓవర్ తో అందరినీ ఆశ్చర్యపరిచింది. అంతేకాదు. ఫిట్ నెస్, న్యూట్రిషన్ నిపుణుడైన సంజయ్ తో ప్రేమలో పడినట్లు వెల్లడించింది. ఆగస్టు 26న వీరిద్దరికీ ఎంగేజ్మెంట్ జరిగింది. దీనికి సంబంధించిన ఫోటోలు సోషల్ మీడియాలో వైరల్ అయ్యాయి. సడెన్ గా ఆమె ఎంగేజ్మెంట్ చేసుకోవడం కోలీవుడ్ నాట హాట్ టాపిక్ అయింది. అయితే ఇప్పుడు సైలెంట్ గా పెళ్లి కూడా చేసేసుకుంది.

ఎంగేజ్మెంట్ జరిగిన సమయంలో కూడా ఆమె పెళ్లి తేదీపై క్లారిటీ ఇవ్వలేదు. కానీ సెప్టెంబర్ 9న ఆమె వివాహ వేడుక వైభవంగా జరిగింది. తమిళ సాంప్రదాయంలో అతి తక్కువ మంది బంధుమిత్రుల సమక్షంలో వీరి వివాహం జరిగినట్లు సన్నిహిత వర్గాల సమాచారం. దీంతో సినీ పరిశ్రమకు చెందిన నటీనటులు ఈ జంటకు సోషల్ మీడియా వేదికగా శుభాకాంక్షలు చెబుతున్నారు.