ఆర్ఆర్ఆర్ సంక్రాంతికే.. కండిషన్స్ అప్లై

‘బాహుబలి’ తర్వాత దర్శక ధీరుడు రాజమౌళి రూపొందిస్తున్న ‘ఆర్ఆర్ఆర్’ మీద అంచనాలు ఏ స్థాయిలో ఉన్నాయో కొత్తగా చెప్పాల్సిన పని లేదు. ఈ సినిమా రిలీజ్ డేట్‌ను ఇప్పటికే రెండుసార్లు మార్చారు. మూడోసారి కూడా మార్చక తప్పని పరిస్థితి నెలకొంది.

2020 జులై 30.. 2021 జనవరి 8 డేట్లను అది తప్పిపోగా.. అక్టోబరు 13 నుంచి కూడా సినిమాను వాయిదా వేయడం లాంఛనమే అని భావిస్తున్నారు. ఐతే తాజా వాయిదా గురించి ఇంకా అధికారిక ప్రకటన మాత్రమే రావాల్సి ఉంది. త్వరలోనే ఒక ప్రెస్ మీట్ పెట్టి చిత్ర బృందం ఈ విషయాన్ని వెల్లడిస్తుందని.. అలాగే కొత్త రిలీజ్ డేట్‌ను కూడా ప్రకటిస్తుందని అంటున్నారు. ఐతే ఆ కొత్త డేట్ ఏదన్నదే తెలియడం లేదు.

కొన్ని రోజుల ముందు వరకు ఉన్న అంచనా అయితే 2022 వేసవికి ‘ఆర్ఆర్ఆర్’ రావచ్చని. కానీ రెండు మూడు రోజులుగా వస్తున్న వార్తలు వేరు. ఈ చిత్రం సంక్రాంతి రేసులో నిలుస్తుందని అంటున్నారు. ఐతే ‘ఆర్ఆర్ఆర్’ సంక్రాంతికి వస్తుందన్న సంకేతాలేమీ లేకపోవడంతో కొన్ని వారాల కిందట ఒకటికి మూడు భారీ చిత్రాలు సంక్రాంతి బెర్తులు బుక్ చేసుకున్నాయి. జనవరి 12 నుంచి వరుసగా మూడు రోజుల్లో భీమ్లా నాయక్, సర్కారు వారి పాట, రాధేశ్యామ్ విడుదల కావాల్సి ఉంది.

మరి ఆ మూడు చిత్రాలు రేసులో ఉండగా ‘ఆర్ఆర్ఆర్’ సంక్రాంతికి ఎలా వస్తుందన్నది అర్థం కాని విషయం. ‘ఆర్ఆర్ఆర్’ సంక్రాంతికి వచ్చేట్లయితే ఆ మూడు చిత్రాలనూ వాయిదా వేయక తప్పదు. ఐతే ఇక్కడో చిన్న ట్విస్ట్ ఉందని తెలుస్తోంది. సరిగ్గా సంక్రాంతికి కాకుండా వారం ముందు ఈ చిత్రాన్ని రిలీజ్ చేస్తే ఎలా ఉంటుందని చిత్ర బృందం ఆలోచిస్తోందట.

ఈ ఏడాది జనవరి 8న రిలీజ్ చేయాలనుకున్నట్లుగానే.. వచ్చే ఏడాది జనవరి తొలి వారం చివర్లో ఈ సినిమాను రిలీజ్ చేస్తే ఎలా ఉంటుందని చూస్తున్నారట. వేసవి అయితే మరీ ఆలస్యం అవుతుందని.. అప్పుడు కూడా ‘కేజీఎఫ్’ సహా వేరే చిత్రాలకు ఆల్రెడీ డేట్లు ఖరారైన నేపథ్యంలో వాటిని డిస్టర్బ్ చేయడం ఎందుకుని.. సంక్రాంతికి వారం ముందు వస్తే ఆ వారం రోజులు వసూళ్ల మోత మోగించుకుని.. రెండో వారం సంక్రాంతి అడ్వాంటేజీని ఉపయోగించుకోవచ్చని.. కొత్త చిత్రాలకు దాని వల్ల పెద్దగా ఇబ్బంది ఉండదని అంచనా వేస్తున్నారట. మరి త్వరలో జరగనున్న ప్రెస్ మీట్లో ఏం ప్రకటన చేస్తారో చూడాలి.