‘మన్మథుడు-2’లో ఆ సీన్ గురించి రాహుల్..

‘మన్మథుడు’ సినిమాను తలుచుకుంటే అక్కినేని నాగార్జున అభిమానులకు ఒక పులకింత కలుగుతుంది. ఆ సినిమా వచ్చి రెండు దశాబ్దాలవుతున్నప్పటికీ.. ఇప్పుడు చూసినా ఆద్యంతం అలరించే చిత్రమది. నాగ్ కెరీర్లోనే వన్ ఆఫ్ ద బెస్ట్ మూవీస్‌ అనొచ్చు ‘మన్మథుడు’ను. ఈ సినిమా ఫలానా హీరో మాత్రమే చేయగలడు, ఆ స్థానంలో మరొకరిని ఊహించుకోలేం అనిపించే సినిమాలు కొన్ని ఉంటాయి. నాగ్ కెరీర్లో ‘మన్మథుడు’ అలాంటి చిత్రాల్లో ఒకటి. అంతగా ఆకట్టుకున్న ఆ చిత్రానికి 17 ఏళ్ల తర్వాత సీక్వెల్ తీశారు. రాహుల్ రవీంద్రన్ దర్శకత్వంలో నాగార్జున కథానాయకుడిగా నటిస్తూ స్వయంగా నిర్మించాడు.

కానీ భారీ అంచనాల మధ్య వచ్చిన ఈ చిత్రం.. దారుణమైన ఫలితాన్నందుకుంది. ‘చి ల సౌ’ లాంటి మంచి చిత్రంతో దర్శకుడిగా పరిచయమైన రాహుల్ నుంచి ఇలాంటి సినిమాను ఎవరూ ఊహించలేదు.

ఐతే ఈ సినిమా రిలీజైనప్పటి నుంచి దీని విషయంలో ఎప్పటికప్పుడు రిగ్రెట్ అవుతూనే ఉన్నాడు రాహుల్. నాగ్ అభిమానులకు పలుమార్లు సారీ కూడా చెప్పాడు. తాజాగా అతను ట్విట్టర్లో తనే హోస్ట్‌గా వ్యవహరిస్తూ ఒక స్పేస్ పెట్టాడు. ఇందులో ‘మన్మథుడు-2’ ప్రస్తావన వచ్చినపుడు.. ఆ చిత్రంలో ఎక్కడ తేడా జరిగిందో ఉదాహరణగా ఓ సన్నివేశం గురించి చెప్పాడు. సినిమా మొదలైన 20 నిమిషాలకు నాగ్ ఒక అమ్మాయితో ఘాటు రొమాన్స్ చేసే సన్నివేశం అది. ఆ సమయంలో రూం షేక్ అయిపోతున్నట్లుగా చూపిస్తారు. ఈ సన్నివేశం చూసి నాగ్ అభిమానులందరం తట్టుకోలేకపోయామని ఓ నెటిజన్ అంటే.. ఆ సీన్ తీసేటపుడు తాము నవ్వుకున్నామని, కానీ థియేటర్లో జనాల రెస్పాన్స్ చూస్తే తాము చేసింది ఎంత పెద్ద తప్పో అర్థమైందని రాహుల్ అన్నాడు.

ఆ సన్నివేశం దగ్గరే ప్రేక్షకులు సినిమా పట్ల వ్యతిరేక బావానికి వచ్చేశారని, అలాంటి సీన్ తర్వాత తాము ‘శంకరాభరణం’ చూపించినా వాళ్ల అభిప్రాయం మారదని.. సినిమాలో ఆ సీన్ పెద్ద బ్లండర్ అయిందని రాహుల్ అంగీకరించాడు. ఒక నెటిజన్ ‘మన్మథుడు-2’ బ్యాడ్ మూవీ ఏమీ కాదని ఏదో అనబోతుంటే. రాహుల్ అందుకుని ఇలాంటి పాజిటివ్ కామెంట్లు చేయకండి, మళ్లీ నాగ్ ఫ్యాన్స్ తనను తగులుకుంటారని చెప్పడం విశేషం.