రకుల్ ఆశలపై నీళ్లు

హీరోలతో పోలిస్తే హీరోయిన్ల కెరీర్ స్పాన్ చాలా తక్కువ. హీరోలు ఒకసారి స్టార్ స్టేటస్ సంపాదిస్తే.. దశాబ్దాలకు దశాబ్దాలు కథానాయకులుగా కొనసాగొచ్చు. వయసు మీద పడ్డా ఇబ్బందేమీ ఉండదు. కానీ హీరోయిన్ల సంగతలా కాదు. నిలకడగా విజయాలందుకుంటూ ఉండాలి. అలాగే గ్లామర్ కాపాడుకోవాలి. అప్పుడే స్టార్ స్టేటస్ నిలబడుతుంది. వరుసగా కొన్ని ఫ్లాపులు వచ్చినా.. కొంచెం వయసు మీద పడి గ్లామర్ తేడా కొట్టినా అంతే సంగతులు. చూస్తుండగానే కెరీర్ మసకబారిపోతుంది.

నాలుగేళ్ల కిందట తెలుగులో నంబర్ వన్ హీరోయిన్ స్టేటస్ అందుకున్నట్లుగా కనిపించిన రకుల్ ప్రీత్.. తర్వాత రెండేళ్లు తిరిగేసరికి టాలీవుడ్లో అడ్రస్ గల్లంతయ్యే స్థితికి చేరుకోవడం ఆశ్చర్యం కలిగించే విషయం. అప్పట్నుంచి ఆమె స్ట్రగుల్ కొనసాగుతూనే ఉంది. తెలుగులో ఆమెకు అవకాశాలు బాగా తగ్గిపోయాయి. కోలీవుడ్లో సైతం ఆమెకు పెద్దగా డిమాండ్ లేదు. ఈ పరిస్థితుల్లో ఆమె ఆశలన్నీ బాలీవుడ్ మీదే నిలిచాయి.

‘దే దే ప్యార్ దే’తో ఓ మోస్తరు విజయాన్నందుకున్న రకుల్.. ‘సర్దార్ కా గ్రాండ్ సన్’ అనే పెద్ద సినిమాలో అవకాశం అందుకుంది. అర్జున్ కపూర్, జాన్ అబ్రహాం, అదితిరావు హైదరి, నీనా గుప్తా లాంటి భారీ తారాగణంతో పెద్ద బడ్జెట్లో తెరకెక్కిన చిత్రమిది. కాశ్వి నాయర్ రూపొందించిన ఈ చిత్రంపై ముందు నుంచి మంచి అంచనాలున్నాయి. థియేట్రికల్ రిలీజ్ కోసమే సినిమాను రెడీ చేసినప్పటికీ.. కొవిడ్ నేపథ్యంలో నెట్ ఫ్లిక్స్‌లో నేరుగా విడుదల చేశారు.

ఐతే సోమవారం అర్ధరాత్రి నుంచి స్ట్రీమింగ్ మొదలు కాగా.. చూసిన వాళ్లందరూ పెదవి విరుస్తున్నారు. ఉదయానికి రివ్యూలు వచ్చేయగా దాదాపుగా అన్నీ యావరేజ్, నెగెటివ్‌గానే ఉన్నాయి. కథ కొత్తగా ఉన్నప్పటికీ.. కథనం నీరసం తెప్పించేసిందని అంటున్నారు. రెండున్నర గంటల పాటు ఈ సినిమాను భరించడం కష్టమే అని అభిప్రాయపడుతున్నారు. పెర్ఫామెన్స్ పరంగా నీనా గుప్తాకు మాత్రమే ప్రశంసలు దక్కుతున్నాయి. రకుల్ పాత్ర, నటన గురించి పెద్గగా చెప్పుకోవడానికి ఏమీ లేదన్నట్లే మాట్లాడుతున్నారు. సినిమాకు నెగెటివ్ టాక్ బాగా స్ప్రెడ్ అవుతోంది. ఫైనల్‌గా ఈ సినిమాను ఫ్లాప్‌ అనే పేర్కొంటున్నారు. తన కెరీర్‌కు మంచి ఊపు తెస్తుందని ‘సర్దార్ కా గ్రాండ్ సన్’ మీద రకుల్ చాలా ఆశలే పెట్టుకుంది. కానీ ఆమె ఆశలు అడియాసలైనట్లే ఉన్నాయి.