అటు తిరిగి ఇటు తిరిగి.. వెంకీ దగ్గరికి?

టాలీవుడ్లో రీమేక్‌లతో భారీ విజయాలందుకున్న స్టార్ హీరోల్లో విక్టరీ వెంకటేష్ ఒకడు. చంటి, అబ్బాయిగారు, రాజా, సూర్యవంశం, దృశ్యం, గురు లాంటి సూపర్ హిట్ రీమేక్ సినిమాలున్నాయి వెంకీ కెరీర్లో. త్వరలో ఆయన్నుంచి రానున్న నారప్ప, దృశ్యం-2 చిత్రాలు సైతం రీమేక్‌లే అన్న సంగతి తెలిసిందే. ఈ రెంటి తర్వాత వెంకీ మరో రీమేక్‌లో నటించే అవకాశాలున్నట్లు వార్తలొస్తున్నాయి. మలయాళంలో సూపర్ హిట్టయిన ‘డ్రైవింగ్ లైసెన్స్’ రీమేక్‌లో వెంకీ నటించనున్నాడట.

ఈ సినిమా తెలుగు రీమేక్ చర్చలు ఇప్పటివి కావు. మలయాళంలో ఈ సినిమా విడుదలై విజయం సాధించిన కొన్ని నెలలకే ఓ నిర్మాత తెలుగు రీమేక్ హక్కులు కొన్నాడు. పవన్ కళ్యాణ్ అని.. రవితేజ అని.. ఇందులో నటించే హీరోల పేర్లు చాలానే వినిపించాయి. చివరికి ఇప్పుడు ఈ రీమేక్ వెంకీ దగ్గర ఆగిందట. ఆయన ఈ చిత్రాన్ని దాదాపు ఓకే చేసినట్లే అంటున్నారు.

ఒక సూపర్ స్టార్ హీరో, అతడి వీరాభిమాని మధ్య వివాదం నేపథ్యంలో నడిచే ఆసక్తికర సినిమా ‘డ్రైవింగ్ లైసెన్స్’. మోటార్ స్పోర్ట్స్ నేపథ్యంలో ఓ సినిమా చేయదలుచుకున్న స్టార్ హీరో.. తన డ్రైవింగ్ లైసెన్స్ పునరుద్ధరించుకునేందుకు ఆర్టీవో ఆఫీసుకి వస్తాడు. అక్కడ తన వీరాభిమాని అయిన మోటార్ వెహికల్ ఆఫీసర్‌ను అనుకోకుండా అవమానిస్తాడు. దీంతో అతను హీరోకు ఎదురు తిరిగి డ్రైవింగ్ లైసెన్స్ విషయంలో ఇబ్బంది పెట్టడం మొదలుపెడతాడు.

ఆ తర్వాత ఎత్తులు పైఎత్తులతో ఈ సినిమా సాగుతుంది. గత ఏడాది హఠాత్తుగా గుండెపోటుతో మరణించిన ‘అయ్యప్పనుం కోషీయుం’ దర్శకుడు సాచీ ఈ సినిమాకు స్క్రిప్టు అందించడం విశేషం. మలయాళంలో పృథ్వీరాజ్ స్టార్ హీరో పాత్రలో కనిపిస్తే.. సూరజ్ అభిమాని పాత్రలో నటించాడు. తెలుగులో వెంకీ ఈ సినిమా చేసేట్లయితే స్టార్ హీరో పాత్రలోనే కనిపించే అవకాశముంది. మరి అభిమాని క్యారెక్టర్ చేసేదెవరో చూడాలి.