ఆలియా ఫస్ట్ లుక్.. అప్పుడే కథలల్లేస్తున్నారు

ఈ రోజు బాలీవుడ్ భామ ఆలియా భట్ పుట్టిన రోజు. ఈ సందర్భంగా ‘ఆర్ఆర్ఆర్’ సినిమాలోంచి ఆమె ఫస్ట్ లుక్ వదిలారు. ఈ చిత్రంలో ఆమె సీత పాత్ర పోషిస్తున్న సంగతి తెలిసిందే. ముందు రోజే రాముడి విగ్రహం ముందు కూర్చుని ఉన్న సీతను వెనుక నుంచి చూపించి ఆలియా ఫస్ట్ లుక్ ఎలా ఉండబోతోందో హింట్ ఇచ్చారు. ఆ అంచనాలకు తగ్గట్లే ఉంది ఈ రోజు రిలీజ్ చేసిన పోస్టర్.

బాలీవుడ్ సినిమాల్లో దాదాపుగా అన్నీ మోడర్న్ రోల్సే చేసిన ఆలియా.. ఇలా ట్రెడిషనల్ లుక్‌లో కనిపించేసరికి హిందీ ప్రేక్షకులు కూడా ఆశ్చర్యపోతున్నారు. హీరోనైనా, హీరోయిన్‌నైనా తన సినిమాలో అత్యంత ఆకర్షణీయంగా చూపిస్తాడని రాజమౌళికి పేరుంది. ఆ పేరుకు తగ్గట్లే ఆలియాను కూడా బెస్ట్ లుక్‌లో చూపించాడు జక్కన్న. ఈ చిత్రం శతాబ్దం ముందు కథతో తెరకెక్కుతున్న సినిమా కావడంతో ఆలియా లుక్ అలా ఉండటంలో ఆశ్చర్యమేమీ లేదు.

ఐతే సీతగా ఆలియా ఫస్ట్ లుక్ చూసి ఆ పాత్ర.. దాంతో ముడి పడ్డ సన్నివేశాల గురించి అప్పుడే జనాలు కొన్ని కథలు అల్లేస్తున్నారు. ఈ పోస్టర్లో అందరినీ ప్రత్యేకంగా ఆకర్షిస్తున్నది ఆలియా మెడలోని లాకెట్టే. అది మగాళ్లు వేసుకునే లాకెట్. అది రామరాజుదే అయ్యుంటుందనడంలో సందేహం లేదు. రామరాజు కోసం ఎదురు చూస్తున్న సీత అంటూ ఈ పాత్ర గురించి జక్కన్న కొంత హింట్ ఇచ్చాడు.

ఒక మామూలు యువకుడిగా ఉన్న సీతారామరాజు.. కొన్నేళ్ల పాటు ఉత్తరాది ప్రాంతానికి వెళ్లి అక్కడ ఒక యోధుడిగా మారి తిరిగి స్వస్థలానికి వచ్చి బ్రిటిష్ వారితో పోరాడేలా ఈ కథ నడుస్తుందని రాజమౌళి ఇంతకుముందే చెప్పిన సంగతి తెలిసిందే. ఆ కథకు ముందు రామరాజు-సీతల మధ్య ప్రణయగాథను చూపించి.. ఆ తర్వాత రామరాజులో ఒక పరివర్తన వచ్చి ఉత్తరాదికి బయల్దేరుతూ ‘నేను తిరిగొచ్చే వరకు ఈ లాకెట్‌లోనే నన్ను చూసుకో’ అంటూ సీతకు చెప్పి వెళ్తాడని.. అప్పట్నుంచి రామరాజు కోసం సీత వేయి కళ్లతో ఎదురు చూస్తూ ఉంటుందంటూ ఈ పాత్రకు సంబంధించిన కథను అల్లేస్తున్నారు నెటిజన్లు.