అమేజాన్ ప్రైమ్‌లోకి మాస్ట‌ర్‌.. డేట్ ఫిక్స్

థియేట‌ర్ల‌లో రిలీజైన సినిమా టీవీల్లోకి రావ‌డానికి ఒక‌ప్పుడు సంవ‌త్స‌రాలు ప‌ట్టేది. త‌ర్వాత ఆ వ్య‌వ‌ధి నెల‌ల‌కు త‌గ్గింది. ఇప్పుడు ఓటీటీ ఫ్లాట్ ఫామ్స్ పుణ్య‌మా అని విడుద‌లైన కొన్ని రోజుల్లోనే టీవీల్లో చూసే అవ‌కాశం ద‌క్కింది. క‌రోనా ప్ర‌భావం వ‌ల్ల థియేట‌ర్ల‌లో కాకుండా నేరుగా ఓటీటీల్లోనే కొత్త సినిమాలు విడుద‌ల‌య్యే ఒర‌వ‌డి కూడా వ‌చ్చింది.

ఐతే ఆ విరామం త‌ర్వాత థియేట‌ర్లు మ‌ళ్లీ తెరుచుకుని కొత్త సినిమాలు అక్క‌డ రిలీజ‌వుతుండ‌టంతో.. అక్క‌డి నుంచి ఓటీటీల్లోకి అవి ఎప్పుడొస్తాయా అని చూస్తున్నారు ప్రేక్ష‌కులు. సంక్రాంతి సినిమాల్లో ఇప్ప‌టికే క్రాక్ ఓటీటీ రిలీజ్ డేట్ క‌న్ఫ‌మ్ అయింది. ముందు జ‌న‌వ‌రి 29 అనుకున్న‌ది కాస్తా.. ఫిబ్ర‌వ‌రి 5కు వాయిదా ప‌డింది. థియేట‌ర్ల‌లో ఇంకా ఈ సినిమా బాగా ఆడుతుండ‌ట‌మే అందుక్కార‌ణం.

కాగా ఇప్పుడు మ‌రో సంక్రాంతి క్రేజీ మూవీ ఓటీటీ రిలీజ్ డేట్ ఖ‌రారైంది. ఆ చిత్ర‌మే.. మాస్ట‌ర్. భారీ అంచ‌నాల మ‌ధ్య తెలుగు, త‌మిళ, హిందీ భాష‌ల్లో ఈ నెల 13న విడుద‌లైన ఈ సినిమా.. రెండు వారాల‌కే అమేజాన్ ప్రైమ్‌లో విడుద‌ల కాబోతోంది. ఈ నెల 28న రాత్రి 10.15 గంట‌ల‌కు ప్రైమ్‌లో ఈ చిత్రాన్ని విడుద‌ల చేయ‌నున్నారు.

తెలుగులో ఈ సినిమా జోరు త‌గ్గిపోయింది కానీ.. త‌మిళంలో బాగానే ఆడుతోంది. ఈ వీకెండ్లోనూ మంచి వ‌సూళ్లే వ‌స్తాయ‌ని అంచ‌నా వేస్తున్నారు. కానీ ఈలోపే ప్రైమ్ ద్వారా మాస్ట‌ర్‌ను రిలీజ్ చేసేస్తుండ‌టం ఆశ్చ‌ర్యం క‌లిగించే విష‌య‌మే. బ‌హుశా ముందుగా జ‌రిగిన ఒప్పందం ప్ర‌కారం ఇలా రిలీజ్ చేయాల్సి వ‌స్తుండొచ్చు. అందుకోసం భారీ మొత్తంలో పుచ్చుకుని ఉండొచ్చు. థియేట్రిక‌ల్ రిలీజ్‌లో డివైడ్ టాక్ తెచ్చుకున్న ఈ చిత్రం ఓటీటీలో ఎలాంటి స్పంద‌న రాబ‌ట్టుకుంటుందో చూడాలి.