పదేళ్ల ప్రేమకు పెళ్లితో శుభం కార్డు వేసిన ఇరుముడి హీరోయిన్!

ఇరుముడి సినిమాతో తెలుగు ప్రేక్షకులకు దగ్గరైన తమిళ హీరోయిన్ ప్రియా భవానీ శంకర్ పెళ్లి ఎట్టకేలకు పెళ్లి చేసుకుంది. తన చిరకాల ప్రియుడు రాజ్‌వేల్ రాజ్‌తో ఆమె ఏడడుగులు వేసింది. అయితే మొదట పెళ్లికి సంబంధించిన ఫొటోలు, వీడియోలు సోషల్ మీడియాలో వైరల్ కావడంతో ఈ విషయం బయటికి వచ్చింది. ఆ తర్వాత కొన్ని గంటలకే ప్రియా కూడా తన పెళ్లి విషయాన్ని అధికారికంగా ప్రకటించింది.

కాలేజీ రోజుల నుంచి పరిచయం ఉన్న రాజ్‌వేల్‌తో ప్రియకు పదేళ్లకు పైగా ప్రేమ ప్రయాణం ఉంది. వీరిద్దరూ చాలా కాలంగా రిలేషన్‌షిప్‌లో ఉన్నప్పటికీ పెళ్లి విషయంలో తొందరపడలేదు. గతంలోనే తన పెళ్లి గురించి ప్రియా పలు సందర్భాల్లో మాట్లాడింది. ఎట్టకేలకు ఇప్పుడు ఈ జంట ఒక్కటైంది.

చెన్నైలో కుటుంబ సభ్యులు, అత్యంత సన్నిహితుల సమక్షంలో ఈ వివాహ వేడుక జరిగింది. ఎలాంటి హంగామా లేకుండా చాలా సింపుల్‌గా పెళ్లి చేసుకున్నారు. పెళ్లికి సంబంధించిన వీడియోలో రాజ్‌వేల్ ప్రియా మెడలో తాళి కడుతున్న దృశ్యాలు ప్రత్యేక ఆకర్షణగా నిలిచాయి.

సినిమా ఇండస్ట్రీ నుంచి ఎక్కువ మందిని ఈ వేడుకకు ఆహ్వానించలేదని తెలుస్తోంది. త్వరలోనే సినీ ప్రముఖులు, స్నేహితుల కోసం రిసెప్షన్ ఏర్పాటు చేసే అవకాశం ఉంది. ప్రస్తుతం ఈ కొత్త జంటకు సోషల్ మీడియా వేదికగా అభిమానులు, సినీ ప్రముఖులు శుభాకాంక్షలు చెబుతున్నారు.

ఇక కెరీర్ విషయానికి వస్తే.. ఇటీవల రవితేజ సరసన ఇరుముడి సినిమాలో నటించి ప్రియా మంచి గుర్తింపు తెచ్చుకుంది. ప్రస్తుతం ఆమె చేతిలో డిమోంటే కాలనీ 3, మరగద నాణయం 2, ఇండియన్ 3 వంటి ఆసక్తికరమైన సినిమాలు ఉన్నాయి. పెళ్లి తర్వాత కూడా వరుస సినిమాలతో బిజీగా ఉండనుంది.