కాయితంకి కలిసి వస్తున్న వివాదాలు

చిన్న సినిమాలకు మార్కెటింగ్ చేసుకుని ఓపెనింగ్స్ వచ్చేలా ప్రేక్షకులని ప్రభావితం చేయడం నిర్మాతలకు పెద్ద సవాల్ గా మారిపోయింది. దీంతో ఏదో ఒక రూపంలో వైరల్ కావాలని లేదా అనుకోకుండా జరిగిన సంఘటనల ద్వారా హైప్ తెచ్చుకోవాలని చూస్తున్న దర్శక నిర్మాతలు లేకపోలేదు. ఆ మధ్య తెల్ల కాగితం పైరసీ బారిన పడి ఇంటిమేట్ సీన్లు బయటికొచ్చాయనే టాక్ బాగానే పని చేసింది. దాని వల్ల ఏమంత పాజిటివ్ జరగకపోయినా జనాల దృష్టి దాని మీదే వెళ్లేలా చేసింది.

తాజాగా ఇడుపు కాయితంకి అలాంటి అవసరం లేకుండా వివాదాలు కలిసి వస్తున్నాయి. కొన్ని వారాల క్రితం టైటిల్ అనౌన్స్ చేసినప్పుడు సోషల్ మీడియాలో పెద్ద ఎత్తున డిబేట్లు జరిగాయి. సబ్ టైటిల్స్ వేస్తారా అంటూ కొందరు ఎక్స్ లో వ్యంగ్యంగా పోస్ట్ చేయడం చిన్నపాటి దుమారం రేపింది. నిన్న విడుదల చేసిన కొత్త పాటతో పాటు నిర్మాత బన్నీ వాస్ అన్న మాటలు పబ్లిసిటీకి మరింత ఉపయోగపడబోతున్నాయి. కావాలని చేయకపోయినా అలా కలిసి రావడం ముమ్మాటికీ ప్లస్సే.

తెలంగాణ వైపు పెళ్లి భోజనాల్లో నేరుగా మందుని క్యాన్లు క్యాన్లు తెచ్చి మరీ విస్తరాకుల పక్కన ప్లాస్టిక్ గ్లాసుల్లో పెట్టి పోస్తారని చూపించిన విధానం పలు విమర్శలకు దారి తీస్తోంది. అసలు మందు ముట్టనిదే తెలంగాణ సంస్కృతిలో ఏ వేడుక జరగదనే రీతిలో ఇలా పదే పదే సినిమాల ద్వారా చూపించడాన్ని సామజిక వాదులు తప్పుబడుతున్నారు. సారా తాగడం తప్పేమీ కాదని కానీ అది లేనిదే తెలంగాణ జనాలు ఉండరనే రీతిలో ఎస్టాబ్లిష్ చేయడం సరికాదని అభ్యంతరం వ్యక్తం చేస్తున్నారు.

ఇక బన్నీ వాస్ చేసిన కామెంట్స్ ఇంకో చర్చకు దారి తీశాయి. తెలంగాణ పల్లెలో షూటింగ్ చేస్తున్నప్పుడు ఇంత పచ్చగా ఉండటం చూసి ఆశ్చర్యం కలిగిందని, వరి పండటం గురించి, గోదావరి జిల్లాలో ఉన్న ఫీలింగ్ కలగడం గురించి అన్న మాటలు వేర్వేరు అర్థాల్లో సోషల్ మీడియాలో తిరుగుతున్నాయి. అమలాపురం, పాలకొల్లు ప్రస్తావన తెచ్చి పోలికలు చేయడం మరింత ఆజ్యం పోసింది. ఇవన్నీ ఎక్కడ ఆగుతాయో కానీ ఇడుపు కాయితంకి కావాల్సిన పబ్లిసిటీ అయితే చక్కగా వచ్చేస్తోంది.