మహాకాల్… ఊహించని కాంబినేషన్

ప్యాన్ ఇండియా జానర్ వల్ల భాషల మధ్య హద్దులు చెరిగిపోతున్నాయి. దర్శకులు ఒక వుడ్డుకే అంకితం కాకుండా ఇతర పరిశ్రమలకు వెళ్తున్నారు. స్టార్ హీరోలను డైరెక్ట్ చేస్తున్నారు. వంశీపైడిపల్లి తమిళంలో విజయ్ వారిసు తీశాక ఇప్పుడు హిందీలో సల్మాన్ ఖాన్ తో మాన్స్ టర్ చేస్తున్న సంగతి తెలిసిందే. గతంలో సందీప్ రెడ్డి వంగ, గౌతమ్ తిన్ననూరి, శైలేష్ కొలను లాంటి యంగ్ డైరెక్టర్లు ఇదే బాటలో పయనించారు. ఇప్పుడీ లిస్టులో కొత్త పేరు చందూ మొండేటి తోడవ్వబోతోంది.

అక్షయ్ కుమార్, రానా దగ్గుబాటి కలయికలో రూపొందే సినిమాకు ‘మహాకాల్’ టైటిల్ నిర్ణయించినట్టు ముంబై నుంచి అందిన ప్రత్యేక సమాచారం. దీనికి కల్ట్ ఫిలిం మేకర్ సంజయ్ లీలా భన్సాలీ కథను అందించడమే కాకుండా నిర్మాతగా కూడా వ్యవహరించబోతున్నారు. కొన్ని నెలల క్రితం చందూ మొండేటి అనౌన్స్ చేసిన యానిమేషన్ మూవీ వాయుపుత్ర ఈ లెక్కన పెండింగ్ లో ఉందని అనుకోవచ్చు. మహాకాల్ నేపథ్యం ఫాంటసీ, స్కై ఫై ఎలిమెంట్స్ తో ఉంటుందని సమాచారం.

తండేల్ సూపర్ హిట్ అయ్యాక చందూ మొండేటి చాలా గ్యాప్ తీసుకున్నారు. ఈ క్రమంలోనే పలు స్క్రిప్టుల మీద వర్క్ చేస్తూ ఫైనల్ గా తన బాలీవుడ్ ప్రయాణానికి పునాది వేసుకున్నారు. కార్తికేయ 2 వల్ల చందూకి నార్త్ సర్కిల్స్ లో మంచి గుర్తింపు ఉంది. ఇప్పుడు మహాకాల్ బిజినెస్ కి అది ఉపయోగపడనుంది. అక్షయ్, రానా పాత్రల్లో ఎవరు హీరో ఎవరు విలన్ అనేది బయటికి రాలేదు కానీ స్టోరీ బ్యాక్ డ్రాప్ చాలా కొత్తగా డిఫరెంట్ గా ఉంటుందని యూనిట్ టాక్.

త్వరలో షూటింగ్ ప్రారంభించుకోబోతున్న మహాకాల్ వచ్చే ఏడాది చివరిలో విడుదలయ్యే ఛాన్స్ ఉంది. అఫీషియల్ గా ఇంకా ప్రాజెక్టు అనౌన్స్ మెంట్ జరగలేదు కాబట్టి త్వరలోనే ఆ వివరాలు తెలియబోతున్నాయి. ప్రొడక్షన్ వైపు ఎక్కువ దృష్టి పెట్టి యాక్టింగ్ తగ్గించేసిన రానా దగ్గుబాటి ఈసారైనా పెద్ద బ్రేక్ అందుకుంటాడేమో చూడాలి. దండయాత్ర చేసినట్టు శరవేగంగా సినిమాలు చేస్తున్న అక్షయ్ కుమార్ కు ఇటీవలే హైవాన్ షాక్ ఇచ్చింది. అయినా స్పీడ్ విషయంలో తగ్గేదేలే అనడం ఈయన స్టైల్.