డైరెక్ట‌ర్ ఏడిస్తే… హీరోనే డైరెక్ట్ చేసుకున్నాడ‌ట‌

కొన్నిసార్లు ద‌ర్శ‌కులు క‌థ చెప్పినంత బాగా సినిమా తీయ‌లేక‌పోతుంటారు. అందుకు అనుభ‌వ లేమి కూడా కార‌ణం కావ‌చ్చు. లేదంటే రాత మీద ఉన్నంత ప‌ట్టు తీత మీద లేక‌పోవ‌చ్చు. ఇలాంటి సంద‌ర్భాల్లో హీరోలే డైరెక్ష‌న్ చేయ‌డం.. లేదంటే తాము గైడెన్స్ ఇస్తూ ఇంకెవ‌రినైనా పెట్టి సినిమా తీయ‌డం లాంటివి జ‌రుగుతుంటాయి. త‌న కెరీర్లోనూ అలా ఒక సినిమాకు జ‌రిగింద‌ని అంటున్నాడు యువ క‌థానాయ‌కుడు సందీప్ కిష‌న్.

త‌మిళ‌నాడు ముఖ్య‌మంత్రి విజ‌య్ త‌న‌యుడు జేస‌న్ సంజ‌య్ ద‌ర్శ‌క‌త్వంలో సందీప్ న‌టించిన సిగ్మా విడుద‌ల‌కు సిద్ధ‌మైన నేప‌థ్యంలో ఒక ఇంట‌ర్వ్యూలో అత‌ను మాట్లాడుతూ.. తాను న‌టించిన ఒక సినిమాకు వారం రోజుల పాటు ద‌ర్శ‌క‌త్వ బాధ్య‌త‌లు నిర్వ‌ర్తించిన విష‌యాన్ని వెల్ల‌డించాడు.

ఆ సినిమా ద‌ర్శ‌కుడు షూట్ మొద‌లైన కొన్ని రోజుల‌కు.. సెట్లో త‌న ద‌గ్గ‌రికి వ‌చ్చి త‌న‌కు ద‌ర్శ‌క‌త్వం రాదంటూ ఏడ్చేశాడ‌ని సందీప్ చెప్పాడు. దీంతో చేసేది లేక ఒక వారం పాటు తానే సినిమాను డైరెక్ట్ చేశాన‌న్నాడు. ఆపై ఈ సినిమాకు చాలామంది ద‌ర్శ‌కులు మారారాని.. వారానికి ఒక‌రు వ‌చ్చి సినిమా పూర్తి చేశార‌ని తెలిపాడు. ఐతే ఆశ్చ‌ర్య‌కరంగా ఆ సినిమా బాగానే ఆడింద‌ని సందీప్ తెలిపాడు. మ‌రి సందీప్ కెరీర్లో ఇలా ఏ సినిమాకు జ‌రిగింది అంటూ నెటిజ‌న్లు చర్చించుకోవ‌డం మొద‌లుపెట్టారు.

ఈ సినిమాను డైరెక్ట్ చేసింది కొత్త ద‌ర్శ‌కుడు అంటున్నాడు కాబ‌ట్టి.. సందీప్ త‌నే ప్రొడ్యూస్ చేసుకున్న ఎ-1 ఎక్స్‌ప్రెస్ సినిమాకే ఇలా జ‌రిగి ఉండొచ్చ‌నే సందేహం క‌లుగుతోంది. అది ఒక త‌మిళ చిత్రానికి రీమేక్ కావ‌డం వ‌ల్లే ద‌ర్శ‌కులు మారినా ఇబ్బంది లేక‌పోయి ఉండొచ్చు. ఐతే ఈ సినిమా బాక్సాఫీస్ ద‌గ్గ‌ర యావ‌రేజ్‌గానే ఆడింది. ఈ చిత్రానికి ద‌ర్శ‌కుడిగా డెన్నిస్ జీవ‌న్ కనుకొల‌ను అనే పేరు ప‌డింది. ఆ సంగ‌తి ప‌క్క‌న పెడితే.. సందీప్ స‌ర‌స‌న ఫ‌రియా అబ్దుల్లా న‌టించిన సిగ్మా గాంధీ జ‌యంతి కానుక‌గా అక్టోబ‌రు 2న ప్రేక్షకుల ముందుకు రానుంది. ఈ సినిమాపై మంచి అంచ‌నాలే ఉన్నాయి.