త్రివిక్ర‌మ్ మొద‌టి డైలాగ్ రాసిందెవ‌రికి?

ఈ ప్ర‌శ్న‌కు స‌మాధానం కోసం ఎక్కువ ఆలోచించాల్సింది ఏముంది? ర‌చ‌యిత‌గా త‌న తొలి సినిమా స్వ‌యంవ‌రం కాబ‌ట్టి.. ఆ సినిమాకే ఆయ‌న ఫ‌స్ట్ డైలాగ్ రాసిన‌ట్లు క‌దా అనిపించ‌వ‌చ్చు. కానీ అధికారికంగా రైట‌ర్‌గా తెర‌పై త్రివిక్ర‌మ్ పేరు ప‌డింది స్వ‌యంవ‌రం మూవీకే అయినా.. అంత‌కుముందు ఆయ‌న చాలా సినిమాల‌కు ఘోస్ట్ రైట‌ర్‌గా ప‌ని చేసిన సంగ‌తి చాలామందికి తెలియ‌దు. 90వ ద‌శ‌కంలో స్టార్ రైట‌ర్‌గా వెలుగొందిన పోసాని కృష్ణ‌ముర‌ళి ద‌గ్గ‌ర కొన్నేళ్ల పాటు ప‌ని చేసిన త్రివిక్ర‌మ్.. కొన్ని చిత్రాల‌కు క‌థ, మాట‌ల్లో కీల‌క పాత్ర పోషించారు.

అందులో ప‌విత్ర బంధం, పెళ్ళి చేసుకుందాం లాంటి సినిమాలున్నాయి. ఈ రెండు చిత్రాల్లో విక్ట‌రీ వెంక‌టేషే హీరో అన్న సంగ‌తి తెలిసిందే. ఆయ‌న‌తో ఇప్పుడు ద‌ర్శ‌కుడిగా ఆద‌ర్శ కుటుంబం సినిమా చేశారు త్రివిక్ర‌మ్. ఈ సినిమా నుంచి తొలి పాట నారాయ‌ణ‌మ్మా రిలీజ్ సంద‌ర్భంగా వెంకీతో త‌న అసోసియేష‌న్ గురించి గుర్తు చేసుకుంటూ.. ఆయ‌న‌కే ర‌చ‌యిత‌గా త‌న తొలి డైలాగ్ రాసిన విష‌యాన్ని వెల్ల‌డించారు త్రివిక్ర‌మ్.

”వెంక‌టేష్ గారు మీకే కాదు.. నాకు కూడా ఫేవ‌రెట్ హీరో. ఆయ‌నంటే నాకు చాలా ఇష్టం. నేను ర‌చ‌యిత‌గా తొలి డైలాగ్ రాసింది ఆయ‌న‌కే. ప‌విత్ర బంధం సినిమాకు నేను డైలాగ్స్ రాశాను. ఆ త‌ర్వాత పెళ్ళిచేసుకుందాం చిత్రానికి కూడా ప‌ని చేశాను. ఐతే నేనెవ‌ర‌న్న‌ది ఆయ‌న‌కు తెలియ‌దు. డైరెక్ట‌ర్ ముత్యాల సుబ్బ‌య్య గారితో మాట్లాడుతూ.. వెంక‌టేష్ గారు నా గురించి ప్ర‌స్తావించార‌ని తెలిసింది. ఈ అబ్బాయి ఎవ‌రో బాగా రాస్తున్నాడు అన్నార‌ట‌. త‌ర్వాత నువ్వు నాకు న‌చ్చావ్ సినిమాకు ప‌ని చేస్తున్న‌పుడు దీని గురించి మేం మాట్లాడుకున్నాం.

వెంక‌టేష్ గారంటే నాకు చాలా భ‌యం. ఇప్ప‌టికీ ఆ భ‌యం ఉంది. ఎందుకంటే మొద‌ట్నుంచి ఆయ‌న్ని దూరం నుంచి చూడ‌డం వ‌ల్ల ఆ భ‌యం కొన‌సాగుతోంది. అది గౌర‌వంతో కూడిన ఇష్టం వ‌ల్ల వ‌చ్చిన భ‌యం కావ‌చ్చు. వెంక‌టేష్ గారి క‌మిట్మెంట్ గొప్ప‌ది. 76 సినిమాలు చేశాక కూడా సినిమా కోసం ఆయ‌న ఎంతో త‌ప‌న ప‌డ‌తారు. సినిమాకు ఏం కావాలో అదంతా ఇవ్వ‌డానికి చూస్తారు. ఒంట్లో బాలేక‌పోయినా త‌న వ‌ల్ల రిలీజ్ టైం లైన్ దెబ్బ కూడ‌ద‌ని డ‌బ్బింగ్ పూర్తి చేసి వ‌చ్చారు” అంటూ వెంకీని త్రివిక్ర‌మ్ ప్ర‌శంస‌ల్లో ముంచెత్తారు. వెంకీ స‌ర‌స‌న శ్రీనిధి శెట్టి క‌థానాయిక‌గా న‌టించిన ఆద‌ర్శ కుటుంబం అక్టోబ‌రు 9న ప్రేక్ష‌కుల ముందుకు రానున్న సంగ‌తి తెలిసిందే.