‘వృషకర్మ’ నుంచి ఏ కబురు లేదేంటి

నాగ చైతన్య గత సినిమా తండేల్ వచ్చి పదిహేడు నెలలు గడిచిపోయాయి. మళ్ళీ తనను తెరమీద చూసే ఛాన్స్ అభిమానులకు కలగలేదు. కారణం వృషకర్మలో జరుగుతున్న ఆలస్యం, విరూపాక్ష ఫేమ్ కార్తీక్ దండు దర్శకత్వం వహిస్తున్న ఈ మిస్టిక్ థ్రిల్లర్ షూటింగ్ ఒక కొలిక్కి వస్తున్న టైంలో ఇంకా రిలీజ్ డేట్ ప్రకటించకపోవటం పట్ల ఫ్యాన్స్ అసంతృప్తి వ్యక్తం చేస్తున్నారు. టీజర్ వచ్చి నెలలు దాటేసినా అప్డేట్స్ పూర్తిగా ఆపేయడం వాళ్ళను నిరాశపరుస్తోంది.

సమస్య కేవలం వృషకర్మదే కాదు.. సంబరాల ఏటిగట్టు, విశ్వంభర, స్వయంభు మొదలైనవి ఏదో ఒక కారణంతో అఫీషియల్ గా డేట్లు వేసుకోలేకపోతున్న సంగతి తెలిసిందే. అయితే చైతు విపరీతంగా కష్టపడిన ఈ ఫాంటసీ మూవీకి సోలో రిలీజ్ దక్కడం చాలా అవసరం. కానీ స్లాట్లు ఒక్కొక్కటిగా అయిపోతున్నా కూడా నిర్మాణ సంస్థ మౌనంగా ఉండటం చూస్తుంటే ఇంకా పని పెండింగ్ లో ఉన్నట్టు అర్థమవుతోంది. పైగా ఓటిటి డీల్ కూడా ఫైనల్ కావాలట.

ఇక ఆప్షన్ల విషయానికి వస్తే ఆగస్ట్ లో ఛాన్స్ లేదు. ఒకవేళ ఆ ఆలోచన ఉంటే ఈ పాటికి ప్రమోషన్లు మొదలైపోయేవి. సెప్టెంబర్ లో ఆల్రెడీ రష్ కనిపిస్తోంది. మీడియం ప్లస్ చిన్న బడ్జెట్ సినిమాలు క్యూ కడుతున్నాయి. అక్టోబర్ జైలర్ 2, ఆదర్శ కుటుంబంతో పాటు ఇంకో రెండు మూడు పెద్ద చిత్రాలు వచ్చే ఛాన్స్ పుష్కలంగా ఉంది. నవంబర్ డ్రైగా ఉంటుంది. డిసెంబర్ లో ఫౌజీ కనక రాకపోతే ఆ అవకాశాన్ని వృషకర్మ వాడుకోవచ్చు. కానీ అదింకా తేలలేదు.

ఇదీ మిస్ అయితే వచ్చే ఏడాది తండేల్ వచ్చిన ఫిబ్రవరికే వెళ్లాల్సి ఉంటుంది. అంటే చైతుకు రెండు సంవత్సరాల గ్యాప్ వచ్చినట్టు అవుతుంది. మీనాక్షి చౌదరి హీరోయిన్ గా నటించిన వృషకర్మ కోసం కోట్ల రూపాయల ఖర్చుతో భారీ సెట్లు వేశారు. ఫాంటసీ ఎలిమెంట్స్ పుష్కలంగా ఉండబోతున్నాయి. బిజినెస్ పరంగా క్రేజ్ ఉంది. మరి ఇన్ని సానుకూలతలు పెట్టుకుని ఎందుకు మౌనంగా ఉన్నారనేది అంతు చిక్కని ప్రశ్న. చూడాలి ఏం చేయబోతున్నారో.