ఎడిటింగ్ VS రన్ టైమ్… ఒక రిస్కీ కథ

యానిమల్ 3 గంటల 20 నిముషాలు ఉన్నా జనం బోర్ కొట్టకుండా చూశారు. పుష్ప 2 అంతకంటే ఎక్కువే అయినా ఆదరించారు. అంతకు ముందు మహానటి, రంగస్థలం, అర్జున్ రెడ్డి, ఆర్ఆర్ఆర్ లాంటివి మూడు గంటలకు దగ్గరగా ఉన్నా కనకవర్షం కురిసింది. అలాని ఇది ప్రతి సినిమాకు అప్లై చేస్తే ఇబ్బందవుతుంది. జనం స్పందన చూశాక కత్తిరింపులు చేసినా, రీ ఎడిటింగ్ చేసినా లాభం ఉండదు. ఏదైనా సరే స్క్రీన్ మీద మొదటి షో పడేలోపే అయిపోవాలి. లేదంటే చాలా నష్టం.

తాజాగా విడుదలైన నాగబంధంకు నిడివి విషయంలో కంప్లైంట్స్ వచ్చాయి. దెబ్బకు మూడో రోజే ఇరవై నిమిషాల కోత విధించారు. కానీ లెన్త్ వల్ల వచ్చిన నెగటివ్ టాక్ సోషల్ మీడియాలో బాగా పాకిపోయింది. పెద్ది విషయంలోనూ ఈ పొరపాటు జరిగింది. దాన్ని సరిదిద్దుకుందామని శివరాజ్ కుమార్ ఫ్లాష్ బ్యాక్ లాంటివి తీసేసినా ప్రయోజనం కలగలేదు. ఇలా జరగడం మొదటిసారి కాదు. అంటే సుందరానికి టైంలో దర్శకుడు వివేక్ ఆత్రేయ మొండిపట్టు థియేటర్ రన్ ని ప్రభావితం చేసింది.

ఒకప్పుడు దానవీరశూరకర్ణ 3 గంటల 45 నిముషాలతో రెండు ఇంటర్వెల్స్ వేసినా వసూళ్లు సునామిలా వచ్చాయి. హం ఆప్కె హై కౌన్ ది కూడా ఇలాంటి చరిత్రే. ఇప్పటి జెన్ జీ మూవీ లవర్స్ అర్థం చేసుకోవాల్సిన విషయం ఒకటుంది. ల్యాగ్ వచ్చిందంటే దానికి బాధ్యత కేవలం ఎడిటర్ ఒక్కడిదే కాదు. దర్శకుడి సూచనల మేరకే ఏం పెట్టాలి ఏం తీసేయాలనే నిర్ణయం జరుగుతుంది. అవసరమైన చోట కీలకమైన మార్పులు ఎడిటర్ సూచిస్తాడు. వాటిని పాటించడం పాటించకపోవడం డైరెక్టర్ ఇష్టం.

కంటెంట్ మీద ఎంత నమ్మకం ఉన్నా సరే దర్శకులు ఒకటికి రెండుసార్లు నిడివి గురించి అలోచించి నిర్ణయాలు తీసుకోవడం బెటర్. ఎవరినో చూసి ఎవరో వాత పెట్టుకున్నట్టు అందరూ ఒకేదారిలో వెళ్తే అందులో కిందపడే వాళ్ళు కూడా ఉంటారు. నిజం చెప్పాలంటే ఈ శాతమే ఎక్కువ. ప్రేక్షకుడు ఒక ప్యాన్ ఇండియా మూవీ కోసం ఎదురు చూసినంత సహనం థియేటర్ సీట్లో కూచున్నాక ప్రదర్శించడు. షూటింగ్ ఆలస్యమైనా భరిస్తాడు కానీ తెరమీద నెమ్మదితనం ఉంటే తట్టుకోలేడు. నెగటివ్ గా చెప్పేస్తాడు. ఇకనైనా మేకర్స్ ఆలోచనా ధోరణిలో మార్పు రావడం చాలా అవసరం. లేదంటే చేతులు కాలాక పట్టుకోవడానికి ఆకులు ఉండవు.