పెద్ది కాస్త తొందరపడి ఉండాల్సింది

400 కోట్లకు పైగా వసూలు చేసినా గట్టిగా బ్లాక్ బస్టరని చెప్పుకోలేని విచిత్ర పరిస్థితి పెద్దిది. ఓవర్సీస్, ఉత్తరాది రాష్ట్రాలు, తమిళనాడు కేరళలో వైఫల్యం వల్ల అంచనాలకు తగ్గట్టు అయిదు వందల కోట్లను అందుకోలేకపోవడం మెగా ఫ్యాన్స్ ని కలవరపరుస్తోంది. ఎందుకంటే రామ్ చరణ్ దీని కోసం పడిన కష్టం అంతా ఇంతా కాదు. ఒళ్ళు హూనం చేసుకుని దర్శకుడు బుచ్చిబాబు మీద నమ్మకంతో ఏది చేయమంటే అది చేశారు. ఫలితం నిరాశపరచకుండా హిట్ అనిపించుకోవడం పెద్దికి దక్కిన గొప్ప ఊరట.

ఈ మూవీ సక్సెస్ ఈవెంట్ జూన్ 23 బుధవారం పెట్టుకున్నారు. నిజానికి కాస్త ముందుగా ప్లాన్ చేసి ఉంటే వీకెండ్ వసూళ్లకు మరింత దోహద పడేదని ఫ్యాన్స్ అభిప్రాయపడుతున్నారు. ఎందుకంటే ఒక వైపు సమంత మా ఇంటి బంగారం జోరు మాములుగా లేదు. ఫ్యామిలీస్ దానికి క్యూ కడుతున్నాయి. నెక్స్ట్ ఉన్న ఆప్షన్ పెద్ది ఒకటే. దీవానా, బాలన్, వంద దేవుళ్ళు, ట్రాన్స్ ఫర్ త్రిమూర్తులు వేర్వేరు ఆడియన్స్ ని టార్గెట్ చేసుకున్నవి తప్ప ప్రత్యేకించి కుటుంబాలను కాదు.

ఎలా చూసినా పెద్ది నెక్స్ట్ శుక్రవారంతో నాలుగో వారంలోకి అడుగు పెడుతుంది. ఇక ఫైనల్ రన్ కి దగ్గరగా ఉందని చెప్పొచ్చు. ఓటిటి అగ్రిమెంట్ నలభై రోజులకు చేశారా లేక నాలుగు వారాలా అనేది ఇంకా తెలియాల్సి ఉంది. ఏపీ తెలంగాణ చాలా ఏరియాల్లో బ్రేక్ ఈవెన్ దాటేసిన పెద్ది రికవరీ పరంగా నైజామ్, ఆంధ్ర లాంటి ప్రాంతాల్లో లాభాలు ఇచ్చింది. ఓవరాల్ గా చూసుకుంటే సంతృప్తి శాతమే ఎక్కువ ఉంది కానీ యునానిమస్ హిట్టు ముద్ర మిస్ అయ్యింది.

బుధవారం వేడుక ఒకరకంగా థాంక్స్ మీట్ అని కూడా చెప్పొచ్చు. ప్రత్యేకంగా చిరంజీవి లాంటి గెస్టులు ఎవరైనా వచ్చే అవకాశం లేకపోలేదు. చరణ్ ఫ్యాన్స్ భారీ ఎత్తున తరలి వచ్చే అవకాశముంది. ఎందుకంటే ఇదయ్యాక చరణ్ మూడు నెలలు విశ్రాంతి తీసుకోబోతున్నాడు. సుకుమార్ ఆర్సి 17 డిసెంబర్ లేదా జనవరిలో స్టార్ట్ కావొచ్చు. షూటింగ్ ఎంత లేదన్నా ఏడాది పైనే పడుతుంది. రిలీజ్ 2027లో ఉంటుంది. సో పెద్ది జ్ఞాపకాలనే వాళ్ళు అప్పటిదాకా భద్రపరుచుకోవాలి.