ప్యారడైజ్ విలన్ గురించి ఏమంటున్నారు

నిన్న ది ప్యారడైజ్ నుంచి రాఘవ్ జుయెల్ పోషించిన విక్రమ్ మాలిక్ ఫస్ట్ లుక్ ని టీజర్ రూపంలో టీమ్ విడుదల చేసింది. కిల్ లో దారుణమైన హంతకుడి పాత్రలో అద్భుతంగా మెప్పించిన రాఘవ్ ని ఈ ప్యాన్ ఇండియా మూవీ కోసం ఎంచుకున్నప్పుడే ప్రత్యేకమైన అంచనాలు నెలకొన్నాయి. అందులోనూ నానితో తలపడే క్యారెక్టర్ కావడంతో హైప్ అమాంతం ఎక్కడికో వెళ్ళిపోయింది. అయితే వీడియో చూశాక జనాల నుంచి మిశ్రమ అభిప్రాయాలు కలుగుతున్నాయి.

రాఘవ్ జుయెల్ లుక్కుని పవర్ ఫుల్ గా డిజైన్ చేసినప్పటికీ ఎక్కడో కొంచెం సెట్ అవ్వలేదనే కామెంట్స్ సోషల్ మీడియాలో ఎక్కువగా వినిపిస్తున్నాయి. అతని పర్సనాలిటీకి తగ్గట్టు స్క్రీన్ ప్రెజెన్స్ ఉండాలి తప్ప అతికించినట్టు ఉండకూడదని కొందరు అభిప్రాయపడ్డారు. అయితే దర్శకుడు శ్రీకాంత్ ఓదెలని ఈ విషయంలో తక్కువంచనా వేయడానికి లేదు. ఎందుకంటే అసలు సినిమాలో దీని తాలూకు ఇంపాక్ట్, అప్పీయరెన్స్ అన్నీ నెక్స్ట్ లెవెల్ లో ఉంటాయని ఇన్ సైడ్ టాక్.

అసలు ప్రతినాయకుడు శిఖంజి మాలిక్ అలియాస్ మోహన్ బాబు కొడుకే ఈ విక్రమ్ మాలిక్. వీళ్లిద్దరికీ నానికి మధ్య ఉన్న సంబంధమే పారడైజ్ లో మెయిన్ డ్రైవింగ్ పాయింటని ఇన్ సైడ్ టాక్. ఆగస్ట్ 21 ఈ సినిమా రావడం లేదు. నిన్న టీజర్ లో రిలీజ్ డేట్ తీసేయడం ద్వారా ఈ విషయాన్ని చెప్పకనే చెప్పారు. కొత్త తేదీ సెప్టెంబర్ లో ఉంటుందా లేక ఏకంగా డిసెంబర్ కు వెళ్తుందా అనేది ఇంకా ఫైనల్ కాలేదు. టీమ్ ఇప్పుడప్పుడే ప్రకటన ఇవ్వకపోవచ్చు.

అన్ని ప్యాన్ ఇండియా సినిమాలకొచ్చే సమస్యే ప్యారడైజ్ కు వచ్చింది. డేట్లు మారుతూనే ఉన్నాయి. అభిమానుల ఎదురు చూపులు పెరుగుతూనే ఉన్నాయి. ఈ నేపథ్యంలో బజ్ తగ్గిపోకుండా చూసుకోవాల్సిన పెద్ద బాధ్యత శ్రీకాంత్ ఓదెల మీద ఉంది. ఎందుకంటే చికిరి చికిరి టైంలో ఉన్న పెద్ది బజ్ కి ట్రైలర్ వచ్చాక కనిపించిన హైప్ కి తేడా ఉంది. ఆ ప్రభావం టాక్ మీద పడి ఓవర్సీస్, నార్త్ లో వసూళ్లు రాలేదు. కాబట్టి ప్యారడైజ్ ఇలాంటి విషయాల్లో జాగ్రత్తగా ఉండాల్సిందే.