చికిరిని చూసే కోణం మారిపోయింది

గత ఏడాది పెద్ది నుంచి చికిరి చికిరి వీడియో సాంగ్ విడుదల చేశాక సోషల్ మీడియా ఊగిపోయింది. మిలియన్లలో వ్యూస్, లక్షల్లో రీల్స్, ఎక్కడ చూసినా దీని గురించి మాట్లాడుకునే రేంజ్ లో ఆన్ లైన్ హడావిడి మాములుగా జరగలేదు. ఒక పెద్ద హీరో సాంగ్ కి ఇంత భీభత్సమైన రెస్పాన్స్ గత కొన్నేళ్లలో ఎప్పుడూ చూడలేదన్నది వాస్తవం. ఈ ఒక్క పాటతోనే ఉత్తరాదిలోనూ పెద్దికి డిమాండ్ ఏర్పడి బిజినెస్ పరంగా మంచి రేటు పలికింది. ఇదంతా అయిపోయిన చరిత్ర.

ఇప్పుడు థియేటర్లలో రెండో వారం కొనసాగుతున్న పెద్ది నుంచి చికిరి చికిరి ఫుల్ వీడియో రిలీజ్ చేశారు. అంటే ఒరిజినల్ విజువల్స్ ని యధాతథంగా పొందుపరిచారన్న మాట. విచిత్రం ఏమిటంటే ఇప్పుడు చికిరి చికిరిని ట్రోలింగ్ కంటెంట్ గా వాడేందుకు కొన్ని యాంటీ ఫ్యాన్స్ గ్రూప్స్ సిద్ధమైపోయి పని మొదలుపెట్టేశాయి. జాన్వీ కపూర్ వెనుక రామ్ చరణ్ వెంటపడే షాట్స్ ని తెలివిగా కట్ చేసి దానికి రాక్షసుడు మ్యూజిక్ లాంటివి జోడించి వ్యూస్ తెచ్చుకుంటున్నాయి.

ఇదొక్కటే కాదు కానీ రకరకాలుగా చికిరిని టార్గెట్ చేస్తున్న వైనం స్పష్టంగా కనిపిస్తోంది. ఇలా ఎందుకు జరిగిందంటే కారణం సింపుల్. పెద్దిలో జాన్వీ కపూర్ ని చూపించిన విధానం మీద ఎంత పెద్ద డిబేట్ జరిగిందో తెలిసిందే. దర్శకుడు బుచ్చిబాబు సారీ చెప్పే దాకా వ్యవహారం వెళ్ళింది. ఆమె సీన్లను ట్రిమ్ చేస్తామని కూడా వివరణ ఇచ్చారు. దాన్ని దృష్టిలో పెట్టుకునే ఇప్పుడు చికిరి చికిరిలో పెద్ది కేవలం కామంతోనే అచ్చియమ్మని ఇష్టపడ్డాడనే రీతిలో ట్రోల్స్ చేస్తున్నారు.

నిజానికి మరీ అసభ్యంగా జుగుప్స కలిగేలా బుచ్చిబాబు షూట్ చేయలేదన్నది వాస్తవం. ఇటీవల సక్సెస్ మీట్ లో అనంత శ్రీరామ్ నిలదీసింది ఈ పాయింట్ మీద. వేరే సినిమాల్లో కల్ట్ బోల్డ్ అని పొగిడి పెద్ది దగ్గరికి వచ్చేటప్పటికీ నీతులు చెప్పడం పట్ల మెగా ఫ్యాన్స్ నిరసన వ్యక్తం చేశారు. ఎవరి ఉద్దేశాలు ఏమైనా చికిరి చికిరికి అప్పట్లో లభించిన ఘన స్వాగతం ఇప్పుడు రూపం మార్చుకుంది. మస్సా మస్సా లాంటి పాజిటివ్ విషయాల కన్నా ఇలాంటి నెగటివ్ అంశాలే ఎందుకు హైలైట్ అవుతాయో వేరే చెప్పాలా.