మల్లు అర్జున్ క్రేజ్ చెక్కు చెదరలేదు

మనం తమిళ హీరోలు రజనీకాంత్, విజయ్, సూర్య లాంటి వాళ్ళను నెత్తినబెట్టుకుని చూస్తాం కానీ మనోళ్ళను వాళ్ళు పిచ్చ లైట్ తీసుకుంటారు. ఏవో బాహుబలి లాంటి ఒకటి రెండు మినహాయించి మహేష్ బాబు, రామ్ చరణ్, జూనియర్ ఎన్టీఆర్ నటించిన డబ్బింగ్ చిత్రాలు తమిళనాడులో ఆడిన దాఖలాలు తక్కువే. కర్ణాటకలో తెలుగు జనాభా గట్టిగా ఉంటుంది కాబట్టి అక్కడ డబ్బింగ్ అవసరం లేకుండానే ఆడతాయి కానీ కేరళలో పరిస్థితి వీటికి పూర్తి భిన్నంగా ఉంటుంది.

మోహన్ లాల్, మమ్ముట్టికి తెలుగులో ఉన్న గుర్తింపు చిరంజీవి, బాలకృష్ణకు మల్లువుడ్ లో లేదు. తర్వాత ఎందరో అక్కడ జెండా పాతాలని ట్రై చేశారు కానీ పనవ్వలేదు. దాంతో ఆ మార్కెట్ ని లైట్ తీసుకున్న దాఖలాలు ఎక్కువ. కానీ అల్లు అర్జున్ అసాధ్యం అనుకున్నది సాధ్యం చేసి చూపించాడు. ఇంటి పేరుని అక్కడి ఫ్యాన్స్ మల్లుగా మార్చుకునే స్థాయిలో మార్కెట్ పెంచుకున్నాడు. దానికి తాజా నిదర్శనంగా హ్యాపీ రీ రిలీజ్ ని చెప్పుకోవచ్చు.

తాజాగా 4కె వెర్షన్ లో మలయాళంలో హ్యాపీని మళ్ళీ విడుదల చేశారు. అనూహ్యంగా హౌస్ ఫుల్ కలెక్షన్లతో మెయిన్ సెంటర్స్ లో అభిమానులు సందడి చేయడం చూసి బన్నీ ఫ్యాన్స్ ఆనందంతో షాక్ కు గురయ్యారు. ఎందుకంటే హ్యాపీ మన దగ్గరే యావరేజ్ గా ఆడిన సినిమా. పెద్ద ఎత్తున నెలకొన్న అంచనాలు అందుకోలేకపోయింది. అయినా కూడా కామెడీ, బన్నీ జెనీలియా కెమిస్ట్రీ, యువన్ శంకర్ రాజా సంగీతం దాన్ని డీసెంట్ ఎంటర్ టైనర్ గా మార్చాయి.

సుమారు ఇరవై ఏడు లక్షల దాకా మొదటిరోజు హ్యాపీ వసూలు చేసినట్టు ట్రేడ్ టాక్. ఇది పెద్ద మొత్తమే. ఎందుకంటే ఇరవై సంవత్సరాల వెనుకటి పాత సినిమా అది కూడా అంతంత మాత్రంగా ఆడిన ఒరిజినల్ వెర్షన్ దృష్ట్యా ఈ స్థాయి స్పందన అనూహ్యమని చెప్పాలి. దీని దెబ్బకు దేశముదురు, సన్నాఫ్ సత్యమూర్తి, జులాయి లాంటి వాటిని మళ్ళీ విడుదల చేసేందుకు కేరళ డిస్ట్రిబ్యూటర్లు రెడీ అవుతున్నారట. బన్నీకి ఆర్య నుంచే అక్కడ మార్కెట్ ఏర్పడటం విశేషం.