చరణ్ లైనప్ లో పెద్ది ఇంపాక్ట్

పెద్ది ఇప్పుడు రామ్ చరణ్ కెరీర్‌లో మరో చాలెంజ్ లాంటి ప్రాజెక్టు. RRR తర్వాత వచ్చిన గ్లోబల్ ఇమేజ్‌ని నిలబెట్టుకోవాలి. అదే టైమ్‌లో సోలో మార్కెట్‌ని మళ్లీ ప్రూవ్ చేసుకోవాలి. ‘గేమ్ ఛేంజర్’ ఫలితం అనుకున్నంతగా వర్కౌట్ కాకపోవడంతో ‘పెద్ది’ మీద భారం మరింత పెరిగింది. ఈ ఒక్క సినిమా చరణ్ నెక్స్ట్ 5 ఏళ్ల లైనప్‌ని డిసైడ్ చేస్తుంది. ఇప్పుడు చరణ్ టేబుల్ మీద మూడు పెద్ద పేర్లు ఉన్నాయి. ఇప్పటికే సుకుమార్ తో కాంబినేషన్ ఫిక్స్ అయ్యింది.

ఇక ఆ తరువాత ప్రశాంత్ నీల్, సంజయ్ లీలా భన్సాలీ లాంటి వారితో చర్చలు జరుగుతున్నాయి. అనుకున్నట్లు కాంబినేషన్ సెట్ అవ్వాలి అంటే ముందు చరణ్ స్ట్రాంగ్ మార్కెట్ పై మరింత పట్టు సాధించాలి. సుకుమార్ ‘పుష్ప’తో బ్రాండ్ అయ్యాడు. ఈ కాంబినేషన్ లో హిట్ కొట్టడానికి ఎక్కువ అవకాశాలు ఉన్నాయి. ఇక నీల్ ‘KGF, సలార్’తో మాస్ డైరెక్టర్‌గా ఫిక్స్ అయ్యాడు. భన్సాలీతో సినిమా అంటే నేషనల్ అవార్డు రేసు. ఈ ఇద్దరిలో ఎవరితో ఫస్ట్ సెట్ అవుతాడనేది ‘పెద్ది’ రిజల్ట్ మీదే ఆధారపడి ఉండవచ్చు.

పెద్ది హిట్ అయితే చరణ్‌కి బేరసారాల పవర్ వస్తుంది. రెమ్యునరేషన్, షేర్స్, రిలీజ్ డేట్ మీద పట్టు ఉంటుంది. కానీ ఫలితం తేడా వస్తే సీన్ రివర్స్ అవుతుంది. అప్పుడు చరణ్‌కి ఆప్షన్స్ తగ్గుతాయి. స్టార్ డైరెక్టర్లు రిస్క్ తీసుకోరు. బడ్జెట్ కంట్రోల్, సబ్జెక్ట్‌లో మార్పులు అడుగుతారు. సీనియర్ల కెరీర్‌లో ఇదివరకే ఇది చూశాం. ఒక్క ఫ్లాప్ వల్ల రెండేళ్లు వెనక్కి వెళ్లిన వారు ఉన్నారు. చరణ్‌కి ఆ పరిస్థితి రాకూడదంటే పెద్ది కచ్చితంగా ఆడాలి.

ఏదేమైనా బుచ్చిబాబు ఈ ప్రెజర్‌ని హ్యాండిల్ చేస్తున్న తీరు కీలకం. ‘ఉప్పెన’ టైమ్‌లో ఎలాంటి అంచనాలు లేవు. ఇప్పుడు చరణ్ స్టార్‌డమ్, రెహమాన్ మ్యూజిక్, రత్నవేలు కెమెరా అన్నీ భారీగానే ఉన్నాయి. విలేజ్ స్పోర్ట్స్ డ్రామా కాబట్టి క్లాస్, మాస్ రెండింటికీ రీచ్ అవుతుంది. ఎమోషన్ వర్కౌట్ అయితే ‘రంగస్థలం’ తర్వాత చరణ్‌కి మరో సోలో బ్లాక్‌బస్టర్ పడుతుంది. కాబట్టి పెద్ది చరణ్ కెరీర్‌కి డైరెక్షన్ ఇచ్చే ప్రాజెక్ట్. హిట్ అయితే అనుకున్న భారీ కాంబినేషన్ ప్లాన్ స్మూత్‌గా వెళ్తుంది. తేడా వస్తే లైనప్ మొత్తం తేడా కొడుతుంది. అందుకే ఇండస్ట్రీ మొత్తం పెద్ది ఫస్ట్ రిపోర్ట్ కోసం చూస్తోంది.