కింగ్ 100… ఒక కబురు చెప్పాల్సింది

ఈ రోజు అక్కినేని నాగార్జునకి చాలా ప్రత్యేకమైన రోజు. ఎందుకంటే నలభై సంవత్సరాల క్రితం సరిగ్గా ఇదే రోజు ఆయన మొదటి సినిమా విక్రమ్ విడుదలయ్యింది. హిందీలో బ్లాక్ బస్టర్ సాధించిన జాకీ శ్రోఫ్ హీరోని వి మధుసూదన్ రావు గారి దర్శకత్వంతో ఏఎన్ఆర్ స్వయంగా అన్నపూర్ణ స్టూడియోస్ బ్యానర్ మీద నిర్మించారు. సూపర్ హిట్ అయ్యింది. తొలి అడుగుకు మంచి మార్కులు పడ్డాయి. అక్కడి నుంచి నాగ్ వెనుదిరిగి చూడాల్సిన అవసరం లేకుండా నాలుగు దశాబ్దాలు గడిచిపోయాయి.

మరో విశేషం మనం రిలీజయ్యింది కూడా ఇదే రోజే. అక్కినేని నాగేశ్వరరావు గారి చివరి మూవీగా అభిమానుల గుండెల్లో చిరస్థానం సంపాదించుకుంది. ఇది కూడా స్వంత బ్యానర్ లోనే నాగార్జున నిర్మించడం కొడుకుగా తండ్రికిచ్చిన గొప్ప నివాళిగా చెప్పుకోవచ్చు. పైగా మూడు తరాల హీరోలు ఇందులో నటించడం ద్వారా ఇంకో ఘనత అందుకుంది. ఇన్ని ప్రత్యేకతలు మే 23కి ఉన్నాయి కానీ ఫ్యాన్స్ కోరుకున్నది మాత్రం మరొకటి ఉంది. అదే కింగ్ 100 అప్డేట్.

కోలీవుడ్ ఫేమ్ ఆర్ కార్తీక్ దర్శకత్వం వహిస్తున్న నాగార్జున వందో సినిమా షూటింగ్ హడావిడి లేకుండా జరుగుతోంది. దాదాపు సగానికి పైగా అయిపోయిందని యూనిట్ వర్గాల టాక్. నాగ్ చాలా చలాకీగా యంగ్ గా కనిపిస్తున్న ఈ మూవీకి లాటరీ కింగ్ అనే టైటిల్ పరిశీలనలో ఉంది కానీ ఇంకా నిర్ధారణ చేయలేదు. 2027 సంక్రాంతికి బంగార్రాజు సీక్వెల్ ఉంటుందని చెబుతున్న తరుణంలో కింగ్ 100 ఈ సంవత్సరమే విడుదల కావాలి. కానీ డేట్ ఫిక్స్ కాలేదు.

ఏదైనా టీజర్ లేదా పోస్టర్ లాంటిది వదిలి ఉంటే బాగుండేదని ఫ్యాన్స్ అభిప్రాయపడుతున్నారు. దేవిశ్రీ ప్రసాద్ సంగీతం సమకూరుస్తున్న ఈ యాక్షన్ డ్రామాలో చాలా గ్యాప్ తర్వాత టబు రీ ఎంట్రీ ఇస్తోంది. గతంలో ఆవిడ నాగార్జునతో కలిసి నటించిన నిన్నే పెళ్లాడతా ఎంత పెద్ద బ్లాక్ బస్టరో చెప్పనక్కర్లేదు. తర్వాత ఆవిడా మా ఆవిడేలో జంటగా యాక్ట్ చేయడంతో పాటు సిసింద్రీలో స్పెషల్ సాంగ్ చేశారు. ఇన్ని ప్రత్యేకతలు ఉన్న కింగ్ 100 దసరాకు రిలీజ్ టార్గెట్ పెట్టుకోవచ్చని టాక్.