కంటెంట్‌లో డీసెంట్… మరి కలెక్షన్లలో?

ఈ రోజుల్లో సినిమాకు మంచి టాక్ వచ్చినంత మాత్రాన హిట్టయిపోతుందనే గ్యారెంటీ లేదు. రిలీజ్‌కు ముందు హైప్ క్రియేట్ కావడం.. అడ్వాన్స్ బుకింగ్స్ కొంచెం గట్టిగా జరగడం.. ఓపెనింగ్స్ బాగా రావడం.. సినిమాకు లాంగ్ రన్ ఉండడం.. ఇవన్నీ జరిగితేనే ఆ చిత్రం హిట్ అనిపించుకుంటుంది. కంటెంట్ పరంగా ‘హిట్’ అనిపించుకుని.. కలెక్షన్ల పరంగా చూస్తే డిజాస్టర్లు అయిన సినిమాలు చాలానే ఉన్నాయి. ఈ జాబితాలోకే చేరేలా శర్వానంద్ మూవీ ‘బైకర్’.

గత వారం విడుదలైన ఈ చిత్రానికి పెయిడ్ ప్రిమియర్స్ నుంచే డీసెంట్ టాక్ వచ్చింది. రివ్యూలు కూడా పాజిటివ్‌గానే ఉన్నాయి. కానీ ఈ టాక్‌కు తగ్గట్లుగా వసూళ్లు మాత్రం రాలేదు. ప్రి రిలీజ్ హైప్ లేకపోవడం ఈ చిత్రానికి మైనస్ అయింది. వీకెండ్లో ఓ మోస్తరు కలెక్షన్లు వచ్చాయి కానీ.. టాక్‌కు తగ్గట్లు అయితే కాదు. తొలి రోజుతో పోలిస్తే వీకెండ్ రెండు రోజులు కలెక్షన్లు పెరుగుతాయని అనుకున్నారు. కానీ అలా జరగలేదు. ఇక వీకెండ్ తర్వాత అయితే ‘బైకర్’ పరిస్థితి దయనీయంగా మారింది. థియేటర్లు పూర్తిగా ఖాళీ అయిపోయాయి.

వీక్ డేస్‌లో పరిస్థితి చూస్తే ‘బైకర్’ థియేట్రికల్ రన్ దాదాపుగా ముగిసిపోయినట్లే కనిపించింది. ఫుల్ రన్లో ఈ సినిమా గ్రాస్ కలెక్షన్లు రూ.20 కోట్ల మార్కును దాటే అవకాశం కనిపించడం లేదు. చిత్ర బృందం ఈ సినిమాను పెద్ద హిట్ అన్నట్లుగా సక్సెస్ మీట్, థాంక్యూ మీట్‌లు నిర్వహిస్తోంది. కానీ రిజల్ట్ ఏంటన్నది ట్రేడ్‌కు బాగా తెలుసు.

రూ.40 కోట్ల గ్రాస్ కలెక్ట్ చేస్తేనే బ్రేక్ ఈవెన్ అయ్యే సినిమాకు ఫుల్ రన్లో అందులో సగానికి మించి వచ్చే అవకాశం లేదంటే బాక్సాఫీస్ లెక్కల్లో ఈ సినిమాను ఏమనాలో ప్రత్యేకంగా చెప్పాలా? ఒకప్పుడు మంచి టాక్ వస్తే సినిమా హిట్ అని ధీమాగా ఉండేవాళ్లు నిర్మాతలు. కానీ ఇప్పుడు ఆ గ్యారెంటీ లేదు. ఇండస్ట్రీ ఎలాంటి దుస్థితిలో ఉందో చెప్పడానికి ఇంతకంటే రుజువేం కావాలి.