పెళ్లయినా ఆగని కాజల్

స్టార్ హీరోయిన్లు చాలామంది పెళ్లి తర్వాత సినిమాలు మానేసిన వాళ్లే. కానీ అందరూ ఇదే బాట పడతారని అనుకోవడానికి లేదు. వివాహం తర్వాత కూడా కెరీర్‌ను బాగా నడిపిస్తున్న వాళ్లూ ఉన్నారు. కాజల్ అగర్వాల్ కూడా ఈ జాబితాలో చేరేలాగే ఉంది. ఆమె పెళ్లి జరిగే సమయానికి ‘ఆచార్య’, ‘ఇండియన్-2’ లాంటి భారీ చిత్రాలు తన చేతిలో ఉన్నాయి. పెళ్లి తర్వాత ఈ సినిమాలు చేసేసి కాజల్ ఊరుకుంటుందని అనుకున్న వాళ్లూ ఉన్నారు. కానీ తనకలాంటి ఉద్దేశాలేమీ లేవని చందమామ చెప్పకనే చెప్పింది. పెళ్లి తర్వాత ఆమె కొత్తగా ఓ సినిమా ఒప్పుకుంది. ఇది ఒక హీరోయిన్ ఓరియెంటెడ్ సినిమా కావడం.. అలాగే కాజల్ ఇంతవరకు చేయని జానర్లో తెరకెక్కబోతుండటం విశేషం.

కాజల్ ఇంతకుముందు జీవా సరసన తమిళంలో ‘కవలై వేండాం’ అనే సినిమాలో నటించింది. తెలుగులో ఈ చిత్రం ‘ఎంత వరకు ఈ ప్రేమ’ పేరుతో అనువాదమైంది. ఆ చిత్రం పెద్దగా ఆడకపోయినా దాని దర్శకుడు డీకే మీద కాజల్‌కు బాగా కుదిరినట్లుంది. అతడి దర్శకత్వంలో ఓ హార్రర్ థ్రిల్లర్ చేయడానికి ఆమె ఓకే చెప్పినట్లు సమాచారం.

ఇందులో మరో ముగ్గురు కథానాయికలు కీలక పాత్రలు పోషిస్తారట. ఈ సినిమా కోసం ఇప్పటికే కాజల్ లుక్ టెస్ట్‌లోనూ పాల్గొందట. అంతా ఓకే అనుకున్నాక ఈ సినిమాకు సంతకం చేసిందట. ఆమె త్వరలోనే ‘ఆచార్య’ చిత్రీకరణలో పాల్గొనబోతోంది. ‘ఇండియన్-2’ ఎప్పుడు పున:ప్రారంభం అయ్యేది మాత్రం ఇంకా స్పష్టత లేదు. మరోవైపు దుల్కర్ సల్మాన్ హీరోగా తెరకెక్కుతున్న ‘హేయ్ సినామికా’లోనూ కాజల్ ఓ కీలక పాత్ర చేస్తోంది. ఇందులో అదితిరావు హైదరి మరో కథానాయిక. మొత్తానికి పెళ్లి తర్వాత కూడా కాజల్ ఇంత బిజీగా ఉండటం విశేషమే.