కూలీ ట్రైలర్.. హైప్‌ను పెంచిందా? తగ్గించిందా?

ఇంకో పది రోజుల్లో బాక్సాఫీస్ దగ్గర మెగా క్లాష్ చూడబోతున్నాం. జూనియర్ ఎన్టీఆర్ ముఖ్య పాత్ర పోషించిన బాలీవుడ్ మూవీ ‘వార్-2’, సూపర్ స్టార్ రజినీకంత్ మూవీ ‘కూలీ’ ఒకే రోజు.. అంటే ఆగస్టు 14న ప్రేక్షకుల ముందుకు రాబోతున్నాయి. ఈ రెండు చిత్రాల్లో ఇప్పటిదాకా హైప్ పరంగా ‘కూలీ’నే కొంచెం ముందంజలో ఉందన్నది వాస్తవం. రజినీకి తోడు అక్కినేని నాగార్జు, ఉపేంద్ర లాంటి పెద్ద హీరోలుండడం.. లోకేష్ కనకరాజ్ ఈ సినిమాకు దర్శకుడు కావడం ఈ హైప్‌కు కారణం. ఈ సినిమా పాటలు కూడా ప్రేక్షకుల్లో క్రేజ్ పెంచాయి.

చాలా ముందే వచ్చేసిన ‘వార్-2’ ట్రైలర్ నాట్ బ్యాడ్ అనిపించింది తప్ప.. ఆహా ఓహో అనుకునే స్థాయిలో మాత్రం లేదు. మరి ‘కూలీ’ ట్రైలర్ ఎలా ఉంటుందో అని అందరూ ఉత్కంఠగా ఎదురు చూశారు. ఆ ట్రైలర్ రానే వచ్చింది. మరి ట్రైలర్‌కు రెస్పాన్స్ ఎలా ఉంది.. ఇది సినిమాకున్న హైప్‌ను పెంచిందా, తగ్గించిందా అన్నది ఆసక్తికరం. ‘కూలీ’ ట్రైలర్ విషయంలో కొంచెం మిక్స్‌డ్ టాకే కనిపిస్తోంది. కొందరు సూపర్ అంటున్నారు. కొందరు అసంతృప్తి వ్యక్తం చేస్తున్నారు. యునానిమస్ పాజిటివ్ ఫీడ్ బ్యాక్ అయితే కనిపించడం లేదు.

లోకేష్ మార్కు స్టైలిష్ టేకింగ్, ఎలివేషన్లు ట్రైలర్‌లో హైలైట్ అయినా.. రజినీ, నాగ్, ఆమిర్ ఖాన్ చాలా అట్రాక్టివ్‌గానే కనిపించినా.. కేవలం క్యారెక్టర్ల పరిచయానికే ట్రైలర్‌ను వాడుకున్నారని.. కథ గురించి ఏమీ చెప్పకపోవడం.. ఆసక్తి రేకెత్తించే డైలాగులు లేకపోవడం పట్ల నెగెటివ్ ఫీడ్ బ్యాక్ వినిపిస్తోంది. ఐతే లోకేష్ అంతా సినిమాలోనే చూపించేలా ఉన్నాడని.. అక్కడ చాలా సర్ప్రైజులు ఉంటాయనే చర్చ కూడా జరుగుతోంది.

కథ పరంగా లోకేష్ ఈసారి ఏదో ప్రయోగం చేసినట్లున్నాడని.. ఇదేదో టైమ్ ట్రావెల్ స్టోరీలా ఉందే అని ట్రైలర్లో కొన్ని విజువల్స్ చూసి ఫ్యాన్స్ అభిప్రాయపడుతున్నారు. అదే సమయంలో రజినీ లాంటి మాస్ హీరోతో.. ఇలాంటి ప్రయోగాలు వర్కవుట్ అవుతాయా అనే సందేహాలు వ్యక్తం చేస్తున్నారు. ట్రైలర్లో కథ విప్పకపోవడం ద్వారా క్యూరియాసిటీ పెంచడానికి ప్రయత్నిస్తున్నట్లు కనిపిస్తున్నా.. ప్రేక్షకులు ఇప్పటిదాకా పెట్టుకున్న అంచనాలకు కొంచెం భిన్నంగా సాగేలా కనిపిస్తున్న సినిమా వారిని నిరాశకు గురి చేస్తుందా అనే డౌట్లు కూడా కొడుతున్నాయి. ట్రైలర్ తర్వాత సినిమాకు హైప్ తగ్గిందా అంటే చెప్పలేం కానీ.. ఉన్న హైప్‌ను పెంచేలా మాత్రం ట్రైలర్ లేదన్నది వాస్తవం.