బిజినెస్‌‌మేన్ చూసి బుక్ చించేసిన రాజమౌళి

మహేష్ బాబు కెరీర్లో పవర్ ఫుల్ హిట్లలో ‘బిజినెస్‌మేన్’ ఒకటి. ‘పోకిరి’ తర్వాత పూరితో మహేష్ చేసిన ఈ సినిమాకు మంచి హైప్ వచ్చింది. ఐతే తొలి రోజు సినిమాకు డివైడ్ టాక్ రావడంతో సినిమా అనుకున్నంత ఆడుతుందా లేదా అన్న సందేహాలు కలిగాయి. కానీ ఆ సందేహాలను పటాపంచలు చేస్తూ సినిమా సూపర్ హిట్ అయింది. మహేష్ కెరీర్లో మోస్ట్ పవర్ ఫుల్ పెర్ఫామెన్స్‌ల్లో ఒకటిగా ఈ సినిమాను చెప్పొచ్చు.

ఈ చిత్రం దర్శక ధీరుడు రాజమౌళిని ఆశ్చర్యానికి గురి చేసిందట. సినిమా సక్సెస్ మంత్రను వివరిస్తూ తాను రాసిన ఓ పుస్తకాన్ని జక్కన్న.. ఈ సినిమా చూశాక చించి అవతల పారేశాడట. ఈ విషయాన్ని ఆయనతో కలిసి టెన్నిస్ ఆడే ఒక మీడియా పర్సన్ ఓ ఇంటర్వ్యూలో తాజాగా వెల్లడించాడు.

సదరు వ్యక్తి పేరేంటో కానీ.. ఆయన రాజమౌళికి టెన్నిస్ మేట్ అట. ఆయన తాజాగా దర్శక నిర్మాత రామ్ గోపాల్ వర్మను ఇంటర్వ్యూ చేశారు. ఆ సందర్భంగా ‘బిజినెస్ మేన్’ ప్రస్తావన తెచ్చారు. తనతో రోజూ టెన్నిస్ ఆడే రాజమౌళి.. సక్సెస్ ఫుల్ సినిమా ఎలా తీయాలి అనే విషయంలో తానొక పుస్తకం రాశానని, అది తనకిస్తానని చెప్పారట. కానీ అంతలో ‘బిజినెస్ మేన్’ రిలీజైందని.. ఆ సినిమా చూశాక ఆ పుస్తకాన్ని చించి పడేశానని రాజమౌళి తెలిపారని ఆయన వెల్లడించారు.

ఈ చిత్రంలో హీరో పాత్రకు నెగెటివ్ షేడ్స్ ఉంటాయని.. బూతులు మాట్లాడతాడని.. అన్నీ చెడ్డ పనులే చేస్తాడని.. అయినా ఈ చిత్రం ప్రేక్షకాదరణ పొందిందని.. సినిమా సక్సెస్ రూల్స్‌కు ఇది విరుద్ధమన్న ఉద్దేశంతో జక్కన్న తన పుస్తకాన్ని బుట్టదాఖలు చేశారని ఆయన టెన్నిస్ మేట్ తెలిపారు.