పుష్ప త‌మిళంలో అయితే ఎవ‌రితో..

టాలీవుడ్ అగ్ర ద‌ర్శ‌కుడు సుకుమార్ కెరీర్లో మిగ‌తా చిత్రాల‌న్నీ ఒకెత్త‌యితే.. పుష్ప‌, పుష్ప‌-2 మ‌రో ఎత్తు. ఈ రెండు చిత్రాలు పాన్ ఇండియా స్థాయిలో సంచ‌ల‌న విజ‌యం సాధించి ఆయ‌న స్థాయిని అమాంతం పెంచేశాయి. ముఖ్యంగా పుష్ప‌-2కు వ‌చ్చిన హైప్.. ఆ సినిమా సాధించిన వ‌సూళ్లు ఒక చ‌రిత్ర‌. ఈ సినిమాలో అల్లు అర్జున్ పాత్ర‌ను సుకుమార్ మ‌లిచిన తీరు.. ఆ పాత్ర‌లో బ‌న్నీ పెర్ఫామెన్స్ గురించి ఎంత చెప్పినా త‌క్కువే. ఆ పాత్ర‌లో మ‌రొక‌రిని ఊహించుకోవ‌డం క‌ష్ట‌మే. మ‌రి సుకుమార్‌కు ఛాయిస్ ఇచ్చి.. త‌మిళ సినీ ప‌రిశ్ర‌మ నుంచి పుష్ప పాత్ర కోసం ఒక‌రిని ఎంచుకోమంటే ఆయ‌న ఏం స‌మాధానం చెప్పార‌న్న‌ది ఆస‌క్తిక‌రం.

చెన్నైలో జ‌రిగిన ఒక అవార్డుల కార్య‌క్ర‌మంలో ఉత్త‌మ ద‌ర్శ‌కుడిగా పుర‌స్కారం అందుకున్న సంద‌ర్భంగా సుకుమార్ ఈ ప్ర‌శ్న‌కు స‌మాధానం ఇచ్చాడు. విజ‌య్, అజిత్ లాంటి టాప్ స్టార్ల‌లో పుష్ప పాత్ర కోసం ఎవ‌రిని ఎంచుకుంటారు అని అడిగితే.. ఈ ఇద్ద‌రు హీరోల చిత్రాలు తాను చాలా త‌క్కువ‌గా చూశాన‌ని సుకుమార్ చెప్పాడు. వీరి కంటే తాను కార్తిని పుష్ప పాత్ర కోసం ఎంచుకుంటాన‌ని చెప్పి ఆశ్చ‌ర్య‌ప‌రిచారు సుకుమార్. కార్తి ముఖంలో హావభావాలు ఎప్పుడూ క‌దులుతూ ఉంటాయంటూ అత‌డికి కితాబిచ్చాడు సుకుమార్. ఇక పుష్ప టైటిల్ వెనుక క‌థ‌ను కూడా సుకుమార్ ఈ వేదిక‌లో పంచుకున్నాడు.

నిజానికి పుష్ప క‌థ‌తో సినిమా తీయాల‌నుకోలేద‌ని… ఎర్ర‌చంద‌నం స్మ‌గ్లింగ్ మీద వెబ్ సిరీస్ చేయాల‌నుకున్నాన‌ని.. దీనికి సంబంధించిన రీసెర్చ్‌లో భాగంగా అనేక‌మంది స్మ‌గ్ల‌ర్ల‌ను కూడా క‌లిశాన‌ని.. అందులో ఒక స్మ‌గ్ల‌ర్ పేరు పుష్ప రాజ్ అని.. త‌న‌ను అంద‌రూ పుష్ప అని పిలుస్తార‌ని.. ఈ క‌థ‌తో సినిమా తీయాల‌నుకున్నాక‌ త‌న పేరునే సినిమాకు టైటిల్‌గా పెట్టామ‌ని సుకుమార్ వెల్ల‌డించాడు.

ఈ కార్య‌క్ర‌మంలో త‌న‌కు ద‌ర్శ‌కుడిగా ఎంతో స్ఫూర్తినిచ్చిన మ‌ణిర‌త్నం గురించి సుకుమార్ మాట్లాడాడు. ఆయ‌న తీసిన గీతాంజ‌లి సినిమా చూసే తాను సినీ రంగంలోకి వ‌చ్చాన‌ని.. తాను ద‌ర్శ‌కుడు కావ‌డానికి కార‌ణ‌మైన ఆయ‌న‌కు ఈ వేదిక మీది నుంచి కృత‌జ్ఞ‌త‌లు చెబుతున్నాన‌ని సుకుమార్ అన్నాడు.