ఒక్క వ్యక్తి వల్ల రూ.10,986 కోట్ల మెట్రో ప్రాజెక్టుకు బ్రేక్

నగరాల్లో ప్రయాణ సమయాన్ని తగ్గించి, ట్రాఫిక్ కష్టాల నుంచి ప్రజలకు ఉపశమనం కల్పించేందుకు ప్రభుత్వాలు వేల కోట్ల రూపాయలు వెచ్చించి మెట్రో రైలు ప్రాజెక్టులను చేపడుతున్నాయి. అయితే ముంబైలో మాత్రం ఓ మెట్రో ప్రాజెక్టు అనూహ్యమైన సమస్యను ఎదుర్కొంటోంది. కోట్లాది రూపాయలతో నిర్మిస్తున్న రైల్వే కారిడార్ పనులు కేవలం 185 మీటర్ల దూరం దగ్గర నిలిచిపోయాయి. దీనికి కారణం సాంకేతిక సమస్యో, నిధుల కొరతో కాదు. మెట్రో మార్గానికి అడ్డుగా ఉన్న ఓ పాత భవనాన్ని ఖాళీ చేసేందుకు ఒక నివాసి అంగీకరించకపోవడమే. దీంతో వేల కోట్ల ప్రాజెక్టు భవిష్యత్తుపై ఆసక్తికర చర్చ మొదలైంది.

ముంబైలో రూ.10,986 కోట్ల అంచనా వ్యయంతో మెట్రో లైన్ 2బీ నిర్మాణం జరుగుతోంది. డీఎన్ నగర్‌లో ప్రారంభమై మండాలే వరకు సాగే ఈ ఎలివేటెడ్ కారిడార్ మొత్తం 23.64 కిలోమీటర్ల పొడవు ఉంటుంది. నగరంలోని కీలక ప్రాంతాలను అనుసంధానించడంతో పాటు ప్రయాణికులకు వేగవంతమైన రవాణా సౌకర్యం కల్పించడం ఈ ప్రాజెక్టు ప్రధాన ఉద్దేశం. అయితే అంధేరీ నుంచి ఖార్ ప్రాంతం మధ్య నిర్మించాల్సిన మార్గంలో ఒక చిన్న భూభాగం ఇప్పుడు అధికారులకు పెద్ద సవాలుగా మారింది.

జుహు సర్కిల్ సమీపంలోని జుహు గుల్మోహర్ కోఆపరేటివ్ హౌసింగ్ సొసైటీ పరిధిలో ఉన్న రెండు పాత భవనాలు ఈ సమస్యకు కేంద్రంగా మారాయి. సుమారు 1980లో నిర్మించిన ఈ భవనాల మీదుగా మెట్రో మార్గం వెళ్లాల్సి ఉంది. ప్రాజెక్టు పనుల కోసం అక్కడి నివాసితులు చాలామంది ఇళ్లను ఖాళీ చేసి వెళ్లిపోయారు. అయితే 55 ఏళ్ల వయసున్న ఒక వ్యక్తి మాత్రం తన నివాసాన్ని వదిలేందుకు సిద్ధపడటం లేదు. దీంతో ఆ భవనాలను తొలగించి మెట్రో నిర్మాణాన్ని కొనసాగించడం సాధ్యం కావడం లేదు.

డీఎన్ నగర్, ఈఎస్ఐసీ నగర్ స్టేషన్ల మధ్య ఉన్న 185 మీటర్ల దూరంలోనే ఈ సమస్య నెలకొంది. ఈ చిన్న భాగం పూర్తయితేనే రెండు స్టేషన్ల మధ్య ట్రాక్ నిర్మాణం పూర్తవుతుంది. అంతేకాకుండా ఇప్పటికే సేవలందిస్తున్న మెట్రో లైన్ 2ఏతో అనుసంధానానికి కూడా ఈ మార్గం కీలకంగా ఉంది. ప్రత్యామ్నాయ మార్గాన్ని ఏర్పాటు చేయడం సులభం కాకపోవడంతో అధికారులు సమస్య పరిష్కారం కోసం ప్రయత్నిస్తున్నారు.

ఈ వివాదం ఇప్పటిది కాదు. 2015లో మెట్రో మార్గం అలైన్‌మెంట్‌లో మార్పులు చేసినప్పటి నుంచి సమస్య కొనసాగుతోంది. ఈ వ్యవహారం న్యాయస్థానం వరకు వెళ్లడంతో పాటు సమీపంలోని పబ్లిక్ గార్డెన్ భూమికి బదులుగా ప్రత్యామ్నాయ స్థలం ఇచ్చే ప్రయత్నాలు కూడా ఫలించలేదు. ఫలితంగా ఏళ్లుగా నిర్మాణం ముందుకు సాగడం లేదు.

ఈ 185 మీటర్ల పనులు పూర్తికాకపోవడంతో ట్రాక్‌లు వేయడం, విద్యుత్ వ్యవస్థ ఏర్పాటు చేయడం, ట్రయల్ రన్స్ నిర్వహించడం వంటి కీలక దశలు ప్రభావితమవుతున్నాయి. ప్రాజెక్టు ప్రారంభం కూడా కనీసం ఎనిమిది నెలలు ఆలస్యమయ్యే పరిస్థితి ఏర్పడింది. ఒకవైపు ప్రజా రవాణా కోసం వేల కోట్లు ఖర్చు చేస్తున్న ప్రభుత్వం, మరోవైపు వ్యక్తిగత ఆస్తి హక్కులు, ప్రజా ప్రయోజనాల మధ్య సమతుల్యత సాధించాల్సిన పరిస్థితి ఎదుర్కొంటోంది. ఈ వివాదానికి చట్టబద్ధమైన పరిష్కారం ఎప్పుడు లభిస్తుందో, ముంబై మెట్రో ప్రయాణికుల నిరీక్షణకు ఎప్పుడు తెరపడుతుందో చూడాలి.