Gulte Telugu Telugu Political and Movie News Updates
అమెరికాలో అక్రమంగా నివసిస్తున్న వలసదారులను వెనక్కి పంపే ప్రక్రియ కొనసాగుతోంది. తాజాగా, 104 మంది భారతీయులను బహిష్కరించిన అమెరికా, ప్రత్యేక మిలిటరీ విమానం ద్వారా వారిని పంజాబ్‌లోని అమృత్‌సర్‌కు తరలించింది. ఈ నేపథ్యంలో, కేంద్ర విదేశాంగ మంత్రి ఎస్. జైశంకర్ రాజ్యసభలో ఈ అంశంపై వివరాలు వెల్లడించారు.
2009 నుంచి ఇప్పటివరకు మొత్తం 15,668 మంది భారతీయులను అమెరికా బహిష్కరించినట్టు మంత్రి తెలిపారు. ప్రతిపక్షాలు దీనిపై ఆందోళన వ్యక్తం చేయగా, అక్రమ వలసదారుల దేశ బహిష్కరణ కొత్తేమీ కాదని, ఇది గత కొన్నేళ్లుగా కొనసాగుతోందని జైశంకర్ స్పష్టం చేశారు. ఈ ప్రక్రియలో భారతీయులు మాత్రమే కాకుండా, పలు దేశాల వలసదారులను కూడా అమెరికా వెనక్కి పంపిస్తోందని వివరించారు.
2009 నుంచి 2024 వరకు అమెరికా బహిష్కరించిన భారతీయుల సంఖ్య:
2009 – 734
2010 – 799
2011 – 597
2012 – 530
2013 – 515
2014 – 591
2015 – 708
2016 – 1,303
2017 – 1,024
2018 – 1,180
2019 – 2,042 (అత్యధికంగా)
2020 – 1,889
2021 – 805
2022 – 862
2023 – 617
2024 – 1,368 (ఇప్పటివరకు)
అమెరికా ప్రభుత్వం తమ దేశ భద్రతా విధానాల్లో భాగంగా వలస నియంత్రణ చర్యలను కఠినతరం చేస్తోందని మంత్రి పేర్కొన్నారు. ఇందులో మహిళలు, చిన్నారులు లేరని, ప్రస్తుతం బహిష్కరించబడిన వారంతా పురుషులేనని అమెరికా ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ICE) సంస్థ భారత ప్రభుత్వానికి స్పష్టం చేసిందని ఆయన తెలిపారు.
ఈ తరలింపు వ్యవహారం పెరుగుతున్న నేపథ్యంలో భారత ప్రభుత్వం కూడా అప్రమత్తమై, విదేశాల్లో అక్రమంగా నివసిస్తున్న భారతీయుల భద్రతను పరిగణనలోకి తీసుకుని, వారికి అవసరమైన సహాయాన్ని అందించేందుకు చర్యలు చేపట్టనున్నట్లు తెలిసింది. అక్రమ వలసల సమస్యను సమర్థవంతంగా పరిష్కరించేందుకు కఠినమైన నిబంధనలను అమలు చేయాలని కేంద్ర ప్రభుత్వం యోచిస్తోంది.
