Gulte Telugu Telugu Political and Movie News Updates
మంగ‌ళ‌గిరిలోని టీడీపీ కేంద్ర కార్యాల‌యం విధ్వంసంలో పాత్ర ఉంద‌ని పోలీసులు కేసు న‌మోదు చేసిన వైసీపీ నాయ‌కులు త‌లో దారి ప‌డుతున్నారు. వీరిలో విజ‌య‌వాడ‌కు చెందిన దేవినేని అవినాష్ తాజాగా దుబాయ్ పారిపోయేందుకు ప్ర‌య‌త్నించ‌గా పోలీసులు ఆయ‌న‌ను ప‌ట్టుకున్నారు. గురువారం అర్థరాత్రి హైదరాబాద్ నుంచి దుబాయ్ పారిపోయేందుకు దేవినేని అవినాష్ ప్ర‌య‌త్నించిన‌ట్టు అధికారులు తెలిపారు. వాస్త‌వానికి వీరిపై లుక్ అవుట్ నోటీసులు జారీ చేసింది.
దీంతో శంషాబాద్ పోలీసులు విమానాశ్ర‌యంలో అవినాష్‌ను అడ్డుకున్నారు. ఈ సంద‌ర్భంగా ఆయ‌న పొంతన‌లేని స‌మాధానం ఇవ్వ‌డంతో వారు మంగళగిరి పోలీసుల కు సమాచారమిచ్చిన‌ట్టు తెలిసింది. దీంతో అవినాష్ పై కేసులు ఉన్నందున ప్రయాణానికి అనుమతి నిరాకరించాలని మంగళగిరి పోలీసులు వారికి తేల్చి చెప్పారు. దీంతో శంషాబాద్ విమానాశ్రయం నుంచి దేవినేని అవినాష్ వెనక్కి వెళ్లిపోయారు.
మంగళగిరి కార్యాల‌యంపై జ‌రిగిన దాడిలో పాల్గొన్న వారిపై పోలీసులు ముందస్తు చర్యల్లో భాగంగా లుకౌట్ నోటీసులు జారీ చేసిన విష‌యం తెలిసిందే.
ఇక, ఈ కేసు ప్ర‌స్తుతం హైకోర్టు ప‌రిధిలో ఉంది. ఈ నెల 20వ తేదీ వ‌ర‌కు వారిపై ఎలాంటి చ‌ర్య‌లూ తీసుకోరాదంటూ.. కోర్టు ఆదేశించింది. ఎమ్మెల్సీలు.. లేళ్ల అప్పిరెడ్డి, త‌ల‌శిల ర‌ఘురాం, మాజీ ఎంపీ నందిగం సురేష్ స‌హా ప‌లువురిపై కేసులు న‌మోద‌య్యాయి. దీంతో వీరంతా ముందస్తు బెయిల్ కోసం కోర్టును ఆశ్ర‌యించారు. దీనిని విచారించిన కోర్టు.. ఈ నెల 20వ తేదీ వ‌ర‌కు వారిపై చ‌ర్య‌లు నిలిపివేసింది. ఇంత‌లోనే అవినాష్ త‌ప్పించుకునే ప్ర‌య‌త్నం చేయ‌డం సంచ‌ల‌నంగా మారింది.
